Rússar réðust á herstöð úkraínska flughersins

Rússneskar hersveitir réðust á herstöð úkraínska flughersins skammt frá borginni Sevastópól á Krímskaga í dag. Að minnsta kosti einn særðist í átökum, en skothríð og sprengingar heyrðust að sögn fréttastofu BBC. Hermennirnir óku niður hlið á brynvörðum bílum og er herstöðin nú á valdi Rússa.

Fyrr í dag hertóku nokkur hundruð mótmælenda herstöð úkraínska flotans á vesturhluta skagans. Engan sakaði þó og yfirgáfu úkraínsku hermennirnir stöðina eftir stuttar samningaviðræður við Rússana.

Innlimun Krímaskaga í Rússland var formlega lokið í gær og sagði Vladímír Pútín Rússlandsforseti að um sögulegan viðburð væri að ræða. Vesturveldin hafa fordæmt innlimunina og hafa bæði Bandaríkin og Evrópusambandi beitt rússneska ráðamenn viðskiptaþvingunum vegna málsins.