Krímskagi formlega orðinn hluti af Rússlandi

Vladimir Pútín, forseti Rússlands, skrifaði fyrir skömmu undir lög sem gera Krímskaga hluta af Rússlandi. Innlimun svæðisins er þá fulllokið og lögin hafa lokið sínu ferli. Áður en hann skrifaði undir lögin sagði Pútín að um stórmerkan atburð væri að ræða.

Lögin fengu flýtimeðferð í gegnum stjórnkerfi Rússlands eftir þjóðaratkvæðagreiðsluna á Krímskaga á sunnudaginn. Samkvæmt kosningunni voru íbúar svæðisins nær einhuga í inngöngu í Rússland.

Stjórnvöld Úkraínu og mörg vestræn ríki hafa fordæmt atkvæðagreiðsluna og aðgerðir Rússlands. Viðskiptaþvingunum hefur verið beitt gegn Rússlandi.