Ísland í riðli með Serbum, Svartfellingum og Ísrael í undankeppni EM 2016

Strákarnir okkar verða í riðli með Serbíu, Svartfjallalandi og Ísrael í undankeppni EM 2016 í handbolta sem fram fer í Póllandi en dregið var í riðlakeppnina þar í landi í dag.

Serbar komu úr fyrsta styrkleikaflokki og slapp Ísland við lið á borð við Króatíu, Danmörku, Frakka og Spánverja. Svartfellingar komu úr þriðja styrkleikaflokki og Ísraelar úr þeim fjórða.

Á heildina litið er þetta nokkuð álitlegur riðill fyrir íslenska liðið sem ætti hæglega að geta tryggt sér keppnisrétt á EM 2016.

Patrekur Jóhanneson og lærisveinar hans frá Austurríki fengu aðra undankeppnina í röð mjög erfiðan riðil en Austurríki er í riðli 7 ásamt Spáni og Þýskalandi.

Drátturinn í undankeppnina:

Riðill 1: Króatía, Noregur, Holland, Tyrkland

Riðill 2: Danmörk, Hvíta-Rússland, Litháen, Bosnía og Hersegóvína

Riðill 3: Slóvenía, Svíþjóð, Slóvakía, Lettland

Riðill 4: Serbía, Ísland, Svartfjallaland, Ísrael

Riðill 5: Ungverjaland, Rússland, Portúgal, Úkraína

Riðill 6: Frakkland, Makedónía, Tékkland, Sviss,

Riðill 7: Spánn, Þýskaland, Austurríki, Finnland