Leikmaður neitaði að vera á glútenfríu fæði

Kastarinn Wade Miley er hæstánægður að vera farinn frá Arizona Diamondbacks til Boston Red Sox. Það þýðir að hann þarf ekki lengur að rífast út af mataræði sínu.

Arizona hefur krafist þess af leikmönnum sínum að þeir séu á glútenfríu fæði en Miley var alls ekki hrifinn af því.

„Við rifumst reglulega út af þessu máli en á endanum létu þeir mig í friði. Þessi fíll var þó alltaf í stofunni og var ekkert að fara," sagði Miley.

„Það má vel vera að þetta mataræði virki fyrir einhverja en það gerir ekkert fyrir mig. Ég gerði það sem ég þurfti að gera til þess að geta kastað á fimm daga fresti."

Hann fær að halda sínu mataræði hjá Sox enda hefur vigtin verið sú sama hjá honum síðustu tvö ár.