NBA: Oklahoma City skoraði 79 stig í fyrri hálfleik | Myndbönd

Oklahoma City Thunder og San Antonio Spurs unnu bæði örugga sigra í NBA-deildinni í körfubolta í nótt en Tyreke Evans tryggði hinsvegar fáliðuðu New Orleans Pelicans liði dramatískan sigur á Toronto með því að skora sigurkörfuna 1,6 sekúndum fyrir leikslok.

Kevin Durant skoraði 21 stig, tók 11 fráköst og gaf 8 stoðsendingar fyrir Oklahoma City Thunder í 127-89 útisigri á Orlando Magic en Thunder-liðið skoraði 79 stig í fyrri hálfleiknum.

Thunder-liðið endaði þarna fjögurra leikja taphrinu á útivelli en þetta var fyrsti útileikurinn af fimm sem liðið spilar á níu dögum.  

Durant var kominn með 15 stig, 7 fráköst og 7 stoðsendingar í hálfleik en náði ekki þrennunni endaði spilaði hann bara 28 mínútur í leiknum. Russell Westbrook var með 17 stig og 6 stoðsendingar og þeir Serge Ibaka og Dion Waiters skoruðu báðir 16 stig. Victor Oladipo skoraði 23 stig fyrir Orlando-liðið og Elfrid Payton var með 19 stig og 8 stoðsendingar.

NBA-meistarar San Antonio Spurs vann 89-69 heimasigur á Utah Jazz en Utah-liðið hefur ekki skorað svona fá stig í öðrum leik á tímabilinu. Tiago Splitter skoraði 14 stig og Kawhi Leonard var með 12 stig og 9 fráköst í afar öruggum sigri Spurs.

Tim Duncan var með 11 stig á 23 mínútum en San Antonio Spurs hefur nú unnið þrjá leiki í röð. Rudy Gobert var með 13 stig og 18 fráköst fyrir Utah Jazz.

New Orleans Pelicans lék án stjörnuleikmanna sinna Anthony Davis og Jrue Holiday, sem eru meiddir, en tókst engu að síður að vinna 95-93 sigur á Toronto Raptors.

Tyreke Evans skoraði sigurkörfuna 1,6 sekúndum fyrir leikslok og var stigahæstur með 26 stig en Alexis Ajinca skoraði 22 stig. DeMar DeRozan skoraði mest fyrir Toronto eða 22 stig en liðið hefur nú tapað sjö af síðustu níu leikjum sínum eftir frábæra byrjun á tímabilinu.

Hér fyrir neðan má sjá nokkur myndbönd frá leikjum næturinnar en þeir voru bara þrír að þessu sinni.

Öll úrslit í NBA-deildinni í nótt:

Toronto Raptors - New Orleans Pelicans 93-95

Orlando Magic - Oklahoma City Thunder 99-127

San Antonio Spurs - Utah Jazz 89-69

Staðan í NBA-deildinni