James Hahn sigraði á Riviera

Lokahringurinn á Northern Trust Open sem kláraðist í kvöld minnti helst á lokahring á Opna bandaríska meistaramótinu en Riviera völlurinn reyndist bestu kylfingum PGA-mótaraðarinnar afar erfiður.

Flatirnar voru hraðar og aðstæður krefjandi þar sem margir skollar sáust en fyrir vikið fengu golfáhugamenn gríðarlega spennandi keppni sem endaði ekki fyrr en á þriðju holu í bráðabana.

Retief Goosen leiddi fyrir lokahringinn á átta höggum undir pari en hann átti erfitt uppdráttar í dag og kom inn á 75 höggum eða fjórum yfir pari. Það nýttu James Hahn, Dustin Johnson og Paul Casey sér en þeir léku allir gott golf á lokahringnum og enduðu jafnir í efsta sæti á sex undir, og því þurfti að grípa til bráðabana.

Þar fékk James Hahn tvo fugla á þremur holum og tryggði sér sinn fyrsta sigur á PGA-mótaröðinni á ferlinum en hann hefur spilað á henni í þrjú ár.

Margir sterkir kylfingar blönduðu sér í toppbaráttuna á lokahringnum en Jordan Spieth, Sergio Garcia, Keegan Bradley og Hideki Matsyuama komu allir einu höggi á eftir forustusauðunum á fimm undir pari.

Fyrir sigurinn fær Hahn rúmlega 140 milljónir króna og keppnisrétt á PGA-mótaröðinni í tvö ár en næsta mót er Honda Classic sem fram fer á Palm Beach og hefst á fimmtudaginn.