Durant enn lengur frá

Kevin Durant, besti leikmaður NBA-deildarinnar í fyrra, er enn frá vegna meiðsla og er ekki vitað hvenær hann getur spilað á nýjan leik.

Sam Presti, framkvæmdarstjóri Oklahoma City Thunder, tilkynnti í dag að félagið hafi ákveðið að gefa Durant algjöra hvíld og er ekki vitað hversu lengi hann verður frá.

„Honum hefur ekki tekist að jafna sig eins fljótt og við óskuðum okkur,“ sagði Presti í dag.

Durant hefur verið að glíma við óþægindi síðan hann fór í aðgerð í október á fæti vegna brákaðs beins. Skrúfa þurfti beinið saman og olli skrúfan óþægindum sem varð til þess að hann fór í aðra aðgerð fyrir tæpum mánuði síðan.

Síðan þá hefur hann aukið álagið hægt og rólega en nú hefur komið í ljós að vandinn er ekki leystur og Durant finnur enn fyrir óþægindum.

Durant hefur spilað samtals 27 leiki á tímabilinu og er með 25,4 stig, 6,6 fráköst og 4,1 stoðsendingu að meðaltali í leik. Oklahoma City er í mikilli baráttu um sæti í úrslitakeppni vesturdeildarinnar og situr þar í áttunda sæti.