Einar verður þjálfari Stjörnunnar

Einar Jónsson hefur verið ráðinn þjálfari meistaraflokks karla hjá Stjörnunni sem féll úr Olísdeild karla nú í vor.

Einar tekur við starfinu af Skúla Gunnsteinssyni sem átti þó eitt ár eftir af samningi sínum við handknattleiksdeild Stjörnunnar.

Einar hefur síðastliðin tvö ár þjálfað Molde í Noregi með góðum árangri en aðilar náðu ekki saman um nýjan samning og ákvað Einar því að halda heim á leið.

Hann gerði karlalið Fram að Íslandsmeistara árið 2013 en hafði einnig þjálfað kvennalið félagsins til margra ára með góðum árangri.

Einar gerði þriggja ára samning við Stjörnuna og verður einnig yfirþjálfari félagsins.