Lokahringurinn á Masters farinn af stað | Nær Spieth að klára dæmið?

Spennan fyrir lokahringinn á Mastersmótinu er mikil en aðstæður til golfiðkunar á Augusta National eru fínar eins og er þrátt fyrir að veðurspáin segi að það séu 30% líkur á rigningu þegar líða tekur á lokahringinn.

Eins og dyggir golfáhugamenn vita leiðir hinn ungi Jordan Spieth með fjórum höggum fyrir lokahringinn en þessi spennandi kylfingur hefur varla stigið feilspor hingað til.

„Ég held að lykillinn á lokahringnum verði þolinmæði, ég verð að vera þolinmóður og ég má ekki láta það fara í taugarnar á mér ef ég missi högg,“ sagði Spieth við fréttamenn Golf Channel eftir þriðja hring í gær.

„Stutta spilið hjá mér hefur verið frábært hingað til, ég hef vippað vel og sett mörg mikilvæg pútt niður, vonandi tekst mér að halda því áfram þrátt fyrir að pressan á lokahringnum verði mikil.“

Stór nöfn geta gert atlögu að titlinum í kvöld

Á eftir Spieth koma þeir Justin Rose og Phil Mickelson, fjórum og fimm höggum til baka en þeir hafa sýnt áður í stórum mótum að þeir geta hæglega unnið forskot eins og það niður.

Mickelson virkaði bjartsýnn í viðtali eftir þriðja hring í gær þrátt fyrir að gengi hans hingað til á árinu hafi ekki verið upp á marga fiska.

„Ég elska að spila á Masters, það er bara allt svo fullkomið við þennan stað. Ég vissi að ég þyrfti að grafa djúpt og koma inn á góðu skori á þriðja hring til þess að eiga möguleika á sunnudeginum og mér tókst það. Hvað sem gerist þá verður lokahringurinn örugglega spennandi.“

Það er erfitt að minnast á gengi hins 21 árs Jordan Spieth á Masters í vikunni án þess að bera hann saman við Rory McIlroy en Norður-Írinn var einnig með forskot fyrir lokahringinn á Mastersmótinu árið 2011, þá 21 árs gamall eins og Spieth.

Minnugir golfáhugamenn muna eftir því að McIlroy gjörsamlega féll saman á lokahringnum og kom inn á 80 höggum eða átta yfir pari. Þar hafði pressan betur en stóra spurningin fyrir lokahringinn í kvöld er hvernig Jordan Spieth höndlar hana.

Þessi golfveisla sem lokahringurinn á Masters mótinu er ávalt verður í beinni útsendingu á Golfstöðinni frá klukkan 17:00.