Kári og félagar björguðu sér í kvöld

Kári Árnason og félagar í Rotherham verða áfram í ensku b-deildinni á næsta tímabili eftir 2-1 sigur á Reading í kvöld.

Rotherham er þar með með fjögurra stiga forskot á næstu lið þegar ein umferð er eftir sem þýðir að bæði Millwall og Wigan féllu niður í C-deildina með þessum úrslitum.

Rotherham hafði tapað þremur stigum á kæru á dögunum og þurftu því að vinna leikinn til að gulltryggja sæti sitt. Það tókst.

Kári Árnason spilaði allan leikinn á miðju Rotherham-liðsins þar sem hann hefur spilað seinni hluta tímabilsins.

Mörk Rotherham komu á sex mínútna kafla um miðjan seinni hálfleik. Það fyrra skoraði Matt Derbyshire á 52. mínútu og það síðara skoraði Lee Frecklington á 58. mínútu.

Oliver Norwood minnkaði muninn á 87. mínútu en Reading tókst ekki að jafna metin og Rotherham verður því áfram í b-deildinni á næsta tímabili.