Alexander verður í stífri sjúkraþjálfun fram að leik

Alexander Petersson gat ekki æft með íslenska landsliðinu er það hóf undirbúning fyrir leikinn gegn Serbum á miðvikudag.

Alexander er að glíma við meiðsli í nára og verður í stífri sjúkraþjálfun fram að leik. Þa fyrst kemur í ljós hvort hann geti tekið einhvern þátt í leiknum.

„Þetta eru erfið meiðsli og hrikalega leiðinlegt að vera í þessari stöðu. Ég verð bara að sjá til og vonast eftir því besta," sagði Alexander eftir æfingu í dag.

Ef hann spilar ekki verður meira álag á Ásgeiri Erni Hallgrímssyni og Rúnari Kárasyni. Rúnar hefur verið að spila vel upp á síðkastið og var kröftugur á æfingu liðsins í dag.

Kallað var á Guðmund Árna Ólafsson inn í hópinn þar sem Alexander getur ekki æft.