Atlanta í undanúrslit

Atlanta Hawks er komið í undanúrslit Austurdeildarinnar eftir sigur á Brooklyn Nets í sjötta leik liðanna í nótt, 111-87. Atlanta mætir Washington í undanúrslitunum.

Haukarnir byrjuðu af miklum krafti og unnu fyrsta leikhlutann 36-23 og leiddu 51-45 í hálfleik.

Þeir gerðu svo út um leikinn í þriðja leikhluta. Þeir unnu hann 41-21 og lokatölur eins og fyrr segir, 111-87.

Paul Millsap átti afar góðan leik fyrir Atlanta. Hann skoraði 25 stig, gaf sex stoðsendingar og tók níu fráköst. Fimm leikmenn Atlanta fóru yfir tólf stigin og þrír með 20 eða meira.

Brook Lopez var stigahæstur hjá Brooklyn með nítján stig, en hann tók þar að auki sjö fráköst.