Byggir hús fyrir skósafnið

Nýjasti leikmaður San Antonio Spurs, La Marcus Aldridge, er með harðari skósöfnurum heims.

Hann safnar sérstaklega strigaskóm og safnið er orðið svo stórt að hann kemur ekki einu pari í viðbót fyrir í skóskápnum sínum.

Hvað gera bændur þá? Jú, þeir byggja sérstakt hús fyrir skóna.

Aldridge er búinn að greina frá því að hann sé þessa dagana að byggja hús út í garði hjá sér sem hefur það eina hlutverk að hýsa strigaskóna hans.

Ekki er vitað nákvæmlega hvað Aldridge á mörg skópör en þau hlaupa örugglega á hundruðum fyrst hann þarf sérstakt hús fyrir skóna.