24 flottustu tilþrifin frá 24 leikja sigurgöngu Golden State | Myndband

NBA meistarar Golden State Warriors töpuðu sínum fyrsta leik á tímabilinu síðustu nótt en liðið vann 24 fyrstu leikina og setti með því nýtt met.

Öllum að óvörum var það lið Milwaukee Bucks sem var fyrsta liðið til að vinna Golden State en Bucks vann leikinn 108–95.

Golden State Warriors átti lítið eftir á tanknum eftir tap á móti Boston Celtics í tvíframlengdum leik kvöldið áður.

Golden State Warriors hefði orðið fyrsta lið sögunnar til að vinna alla sjö leikina í sjö leikja ferðalagi og var líka farið að nálgast met Los Angeles Lakers frá 1971 til 1972.

Los Angeles Lakers vann 33 leiki í röð 1971-72 en Golden Statw liðið var búið að vinna 28 leiki í röð, 24 á þessu tímabili og fjóra síðustu deildarleiki síðasta tímabils.

NBA-deildin notaði tækifærið og heiðraði 24 leikja sigurgöngu Golden State Warriors í upphafi þessa tímabils með því að taka saman myndband með 24 flottustu tilþrifin frá þessum 24 sigurleikjum.

Stephen Curry er að sjálfsögðu í mjög stóru hlutverki í syrpunni en það er fleiri frábærir leikmenn í þessu Warriors-liði eins og Klay Thompson, Draymond Green og Andre Iguodala.

Þetta skemmtilega myndband má sjá hér fyrir neðan.