Wyclef Jean næstum því búinn að koma Zaza Pachulia í byrjunarlið Vestursins

Zaza Pachulia, miðherji Dallas Mavericks í NBA-deildinni í körfubolta, var ekki langt frá því að komast í byrjunarlið Vesturdeildarinnar í Stjörnuleik NBA sem fer fram í Toronto í næsta mánuði.

Zaza Pachulia er á sínu fyrsta ári með Dallas Mavericks og einnig í fyrsta sinn á NBA-ferlinum fastamaður í byrjunarliði.

Zaza Pachulia fékk alls 768,112 atkvæði og varð fjórði hæstur af framherjum og miðherjum Vesturdeildarinnar en aðeins þrír komust í liðið.  Hann fékk fleiri atkvæði en Draymond Green hjá Golden State Warriors (726,616) sem hefur verið að margra mati einn af bestu leikmönnum deildarinnar á þessu tímabili.

Pachulia endaði á því að vera fjórtán þúsund atkvæðum á eftir San Antonio manninum Kawhi Leonard.

Zaza Pachulia er á sínum þrettánda tímabili í NBA-deildinni en hann er með 10,5 stig og 10,8 fráköst að meðaltali í leik. Milwaukee Bucks skipti honum til Dallas Mavericks í sumar til að lækka launakostnað liðsins.

Pachulia fékk mun fleiri atkvæði en margir af frægari leikmönnum NBA-deildarinnar eins og þeir Blake Griffin hjá Los Angeles Clipppers (651,850), Tim Duncan hjá San Antonio Spurs (431,087), Anthony Davis hjá New Orleans Pelicans (400,688), DeMarcus Cousins hjá Sacramento Kings (364,270), LaMarcus Aldridge hjá San Antonio Spurs (268,003) og Dirk Nowitzki (173,317) sem er liðsfélagi hans hjá Dallas Mavericks.

Dirk Nowitzki grínaðist með það þegar fyrst fréttist af miklum atkvæðafjölda Zaza Pachulia að allir með internet-tengingu í heimalandi hans Georgíu væru að kjósa hann og það leikur enginn vafi á því að Georgíumenn voru duglegir að kjósa.

Það var þó líklega tónlistamaðurinn Wyclef Jean sem var næstum því búinn að koma sínum manni inn í byrjunarliðið. Þeir eiga sameiginlegan vin frá Georgíu og Wyclef Jean setti inn lag á samfélagsmiðla þar sem hann hvatti fólk að kjósa Pachulia.   Wyclef Jean  er fyrrum Fugees-maður og á marga fylgjendur. Pachulia fékk því  frábæra auglýsingu á síðum Fugees-rapparans.

Zaza Pachulia lék í fyrsta sinn í NBA-deildinni árið 2003 en hann hafði aldrei komist hærra en í tíunda sæti með framherja síðan að reglunum um stöður inn í byrjunarliðin í Stjörnuleiknum var breytt.