Milner: Maður þarf stundum svona töfra eins og hjá Coutinho

James Milner, leikmaður Liverpool, var kátur eftir jafnteflið á Old Trafford í kvöld en lærisveinar Jürgen Klopp eru komnir áfram í átta liða úrslitin.

Manchester United komst yfir með marki Anthony Martial í kvöld en Phillippe Coutinho jafnaði metin og gerði út um drauma United-liðsins með frábæru marki fyrir lok fyrri hálfleiks.

„Coutinho er frábær leikmaður og á bara eftir að verða betri. Stundum þarf maður svona töfra,“ sagði Milner eftir leikinn í kvöld.

United fékk færi til að bæta við mörkum í fyrri hálfleik en þau voru af skornum skammti í þeim síðari.

„Bæði lið fengu færi. Við spiluðum ekki eins vel og við gerðum í fyrri leiknum en við gerðum nóg til að komast áfram. Markvörðurinn þeirra varði stundum mjög vel,“ sagði James Milner.

Markið hans Coutinho má sjá í spilaranum hér að ofan.