Lagerbäck aldrei upplifað annan eins fjölmiðlaágang

Ómar Smárason, fjölmiðlafulltrúi KSÍ, hefur ekki áhyggjur af því að mikil fjölmiðlaumfjöllun um íslenska karlalandsliðið í knattspyrnu muni hafa áhrif á gengi liðsins á Evrópumótinu sem hefst í Frakklandi á föstudag. Fyrsti leikur Íslands er við Portúgal þann 14. júní og flýgur liðið út núna klukkan 11. Ómar var því í Leifsstöð þegar Vísir náði tali af honum í morgun.

Hann segir að þó að EM í knattspyrnu karla sé af annarri stærðargráðu en EM í knattspyrnu kvenna þá skili sú reynsla sem KSÍ hefur fengið á því móti sér nú auk þess sem Lars Lagerbäck, þjálfari landsliðsins, hefur farið á nokkur stórmót og býr því yfir mikilli reynslu, þar á meðal þegar kemur að fjölmiðlaumfjölluninni.

Segir til um hversu mikið heimurinn er að fylgjast með okkur

Lars hefur sagt við erlenda fjölmiðla að sú athygli sem hann og íslenska landsliðið hafa fengið seinustu misseri sé mun meiri en sú athygli sem hann fékk þegar hann þjálfaði sænska karlalandsliðið.

Það vekur óneitanlega athygli ekki síst vegna þess að gríðarlega mikið var fjallað um Lars og sænska landsliðið þegar hann sendi stjörnuna Zlatan Ibrahimovic heim úr keppnisferð auk tveggja annarra leikmanna sem brotið höfðu reglur þjálfarans.

„Já, það er svolítið magnað að maður sem hefur farið á þetta margar Evrópukeppnir og heimsmeistaramót sé að upplifa mesta fjölmiðlaágang eða umfjöllun á sínum ferli. Það segir kannski til um hversu mikið heimurinn er að fylgjast með okkur,“ segir Ómar.

Tugir blaðamanna fylgja liðinu

Hann segir að um 60 blaðamenn muni fylgja íslenska landsliðinu, helmingurinn eru íslenskir blaðamenn og helmingurinn erlendir blaðamenn. Það sé svipaður fjöldi og hefur fylgt liðinu allt frá að það spilaði haustið 2013 við Króatíu í umspili um laust sæti á HM í knattspyrnu.

„Við erum orðin býsna vön þessu. Við erum að fá þennan fjölda á alla leikina sem við höfum verið að spila. Skipulagið úti er fyrsta flokks og gæslan er mjög góð og á meðan við skipuleggjum viðburðina okkar mjög vel og fjölmiðlar fá sanngjarnan aðgang og þannig að aðgangurinn verði ekki að áreiti þá held ég að allir verði sáttir,“ segir Ómar.

Hann segir að blaðamenn frá þeim löndum sem eru með Íslandi í riðli hafi boðað komu sína á fjölmiðlaviðburði landsliðsins auk sænskra, bandarískra og brasilískra blaðamanna.

KSÍ stillir upp dagskrá landsliðsins en Knattspyrnusamband Evrópu, UEFA, stýrir hverjir í raun hvernig fjölmiðlar fá aðgang að liðinu. Að sögn Ómars eru skyldur liðsins þær að það sé með að minnsta kosti einn fjölmiðlaviðburð á dag þar sem leikmenn og/eða þjálfarar veiti viðtöl.

„Við höfum tekið þá nálgun að vera tiltölulega opin þegar kemur að fjölmiðlaufjöllun um landsliðið og erum opnari en flest önnur lönd í þessu,“ segir Ómar.