Lilja íhugar alvarlega varaformannsframboð

Lilja Alfreðsdóttir segir stöðu forsætisráðherra innan Framsóknarflokksins sterka eins og formannsins. Hún viðurkennir að ólga sé innan flokksins þótt formaðurinn hafi gert hreint fyrir sínum dyrum vegna Panamaskjalanna. Hún útilokar ekki framboð í embætti varaformanns.

Forsætisráðherra lýsti því yfir á miðstjórnarfundi Framsóknarflokksins um síðustu helgi að hann gæti ekki boðið sig fram til embættis varaformanns að nýju að óbreyttri stjórn flokksins. En á fundinum skiptust menn í fylkingar milli hans og Sigmundar Davíðs Gunnlaugssonar formanns flokksins.

Nú hafa tveir ráðherrar, sem báðir lýsa stuðningi við Sigmund Davíð til áframhaldandi formennsku, sagt að til greina komi að þeir bjóði sig fram í varaformanninn. Gunnar Bragi Sveinsson í Fréttablaðinu í dag og utanríkisráðherra útilokar heldur ekki framboð.

„Það eru mjög margir sem hafa hvatt mig til þess að gefa kost á mér í það og ég er að íhuga það þessa stundina,“ segir Lilja Alfreðsdóttir, utanríkisráðherra.

Lilja segir þá sem skorað hafa á hana koma alls staðar að af landinu en þó aðallega úr Reykjavík og úr stuðningshópum bæði Sigmundar Davíðs og Sigurðar Inga.

„Ég hef áhuga á því að vera í forystu flokksins. Ég veit ekki alveg hvort að sá tími sé kominn en eins og ég segi mér þykir mjög vænt um þessa hvatningu sem ég er að fá þessa dagana,“ segir Lilja

Tvöfalt kjördæmaþing Framsóknarmanna fer fram í Norðausturkjördæmi um helgina. Þar verður kosið um fimm efstu sæti listans en þrír þingmenn í kjördæminu sækjast eftir fyrsta sætinu ásamt Sigmundi Davíð Gunnlaugssyni formanni flokksins. Sigurður Ingi, hefur ekki útilokað að bjóða sig fram til formanns en líklegt þykir að hann bíði með þá ákvörðun fram yfir kjördæmisþingið fyrir norðan.

„Ég met stöðu hans mjög góða. Hann hefur verið mjög öflugur sem forsætisráðherra og ég held að flestir hafi fundið fyrir því, þannig að staða hans er sterk og staða formannsins er líka sterk. Forystan er ansi breið og öflug en auðvitað erum við að fara inn í flokksþing vegna þess að það er ólga í flokknum,“ segir Lilja.

Hún segist ekki óttast að Wintris-mál Sigmundar Davíðs komi til með að skaða flokkinn í komandi kosningum.

„Sigmundur Davíð hefur farið yfir þessi mál nokkuð gaumgæfilega, bæði opna heimasíðu og birt allt er tengist því,“ segir Lilja

Tveir fyrrverandi formenn flokksins hafa stigið fram núna bara á síðasta sólarhring og sagt að hann sé ekki búinn að gera hreint fyrir sínum dyrum. Hvernig meturðu það?

„Ég met það þannig að það er gott að fólk lýsi yfir sínum skoðunum og það á bara eftir að koma í ljós á flokksþingi hver umræðan verður,“ segir Lilja

Sigurður Ingi kom heim úr opinberri heimsókn forsætisráðherra til Danmerkur í gær og vildi lítið tjá sig við fréttastofu þegar hann var inntur eftir því hvort hann ætlaði í formannsframboð.

„Ég hef ekki bara getað fylgst með því sem hefur gengið hérna á, á Íslandi og ég held að það hafi nú ekkert gerst sem ekki þoli að bíða einhverja klukkutíma, annað hvort seinnipartinn í dag eða á morgun,“ sagði Sigurður Ingi við komuna til landsins í gær.

Fréttastofa reyndi ítrekað í dag að ná í Sigurð Inga í dag en án árangurs.