Tímalína: Frá bjálkahúsi í N-Dakóta til mögulegs tölvuinnbrots

Yfirlýsingar Sigmundar Davíðs Gunnlaugssonar, formanns Framsóknarflokksins og fyrrverandi forsætisráðherra, á miðstjórnarfundi flokksins á laugardag um innbrot í tölvu hans og að hann hafi verið eltur til útlanda hafa vakið mikla athygli.

Í ræðunni minntist hann jafnframt á boð sem hann hafi fengið í bjálkahús þegar hann var á ferð í Norður-Dakóta en Sigmundur lagði á laugardaginn út af ræðu sinni á flokksþingi Framsóknar í fyrra þar sem hann sagði kröfuhafana hafa tekið saman persónulegar upplýsingar um meðal annars stjórnmálamenn og blaðamenn.

Vísir fer hér yfir atburðarásina sem tengja má við þessar yfirlýsingar allt frá því að Sigmundur Davíð fór til Norður-Dakóta í ágúst 2013 og til dagsins í dag.

2-6. ágúst 2013.

Sigmundur Davíð og eiginkona hans, Anna Sigurlaug Pálsdóttir, eru heiðursgestir á Íslendingahátíðum sem haldnar voru í Gimli í Manitoba og Mountain í Norður-Dakóta, og taka þar þátt í hátíðarhöldum.

Á sama tíma er Sigmundi, að eigin sögn, boðið að hitta ótilgreinda menn í bjálkahúsi á afviknum stað í N-Dakóta í Bandaríkjunum þar sem ekkert símasamband er. Væri markmiðið að leysa málin þannig að allir gætu verið sáttir líkt og haft var eftir Sigmundi á flokksþingi Framsóknarflokksins um helgina.

10. apríl 2015.

„Við vitum að fulltrúar kröfuhafanna hafa tekið saman persónulegar upplýsingar um stjórnmálamenn, blaðamenn og aðra sem hafa tjáð sig um þessi mál eða teljast líklegir til að geta haft áhrif á gang mála.“

Þetta segir Sigmundur Davíð á 33. flokksþingi Framsóknarmanna sem hefst þennan dag. Segir hann einnig að reglulega hafi verið skrifaðar „leyniskýrslur“ fyrir kröfuhafana, þar sem upplýsingar eru veittar um gang mála á Íslandi. Í stjórnmálum, opinberri umræðu, fjármálakerfinu og svo framvegis.

12.apríl 2015.

Steinunn Guðbjartsdóttir, þáverandi formaður slitastjórnar Glitnis segir yfirlýsingar forsætisráðherra ekki svaraverðar, það sé út í hött að slitastjórnir eða kröfuhafar hafi stundað njósnir eða reynt að sálgreina stjórmála- eða blaðamenn eins og haldið sé fram í ræðunni. Jóhannes Rúnar Jóhannsson hjá slitastjórn Kaupþings tekur í sama streng.

1. apríl 2016.

Óskað er eftir því að Rekstarfélag stjórnarráðsins að tölva Sigmundar Davíðs verði skoðuð vegna „rökstudds gruns hans um mögulegt innbrot“ í tölvuna.

Við ítarlega leit fundust ekki staðfest ummerki að innbrot hafi átt sér stað líkt og Vísir hefur fengið staðfest.

3. apríl 2016.

Viðtal Jóhannes Kr. og Sven Bergman við Sigmund Davíð birt í sérstökum Kastljós-þætti. Upplýsingar úr Panama-skjölunum sýna fram á tengsl Sigmundar Davíðs og annarra íslenskra stjórnmálamanna við aflandsfélög í skattaskjólum.

5. apríl 2016.

Sigmundur Davíð segir af sér sem forsætisráðherra eftir fjölmenn mótmæli almennings vegna þeirra uppljóstrana sem koma fram í Panama-skjölunum. Sigurður Ingi Jóhannson, varaformaður Framsóknarflokksins tekur við embætti forsætisráðherra og á næstu dögum mynda Sjálfstæðisflokkur og Framsóknarflokkur nýja ríkisstjórn.

10. september 2016.

Sigmundur Davíð lýsir því yfir á haustþingi Framsóknarmanna á Akureyri að erlendir kröfuhafar hafi fylgst vel með honum á undanförnum árum. Brotist hafi verið inn í tölvu hans og honum fylgt eftir um heiminn.

„Ég gerði alltaf ráð fyrir því að það væri fylgst með því sem ég sagði í símann, ég veit að það var brotist inn í tölvuna hjá mér, ég lét skoða það, og við reyndum eins og við mögulega gátum að forðast að hleypa þessum aðilum að okkur,“ segir Sigmundur Davíð.

Greinir hann einnig frá því að ótilgreindir menn hafi, árið 2013, komið að máli við sig og sagst vita að hann ætli að taka þátt í hátíðarhöldum Vestur-Íslendinga í Norður-Dakóta. Þeir hafi boðið honum að hitta sig í bjálkahúsi á afviknum og einangruðum stað til þess að leysa málin.

12. september 2016.

Embætti Ríkislögreglustjóra staðfestir við Vísi að embættinu hafi ekki verið tilkynnt um innbrot í tölvu forsætisráðherra.

Rekstrarfélag Stjórnarráðsins segist hafa móttekið beiðni um að rannsaka tölvu Sigmundar Davíðs þann 1. apríl síðastliðinn en engin staðfest ummerki um innbrot hafi fundist eftir ítarlega skoðun rekstrarfélagsins.

Sigurbjörg Sigurgeirsdóttir stjórnsýslufræðingur segir það alvarleg tíðindi að reynt sé að brjótast inn í tölvu forsætisráðherra. Eðlilegt hefði verið að kalla til samráð hóps sem hafi með öryggismál ríkisins að gera til þess að fara yfir málin. Róbert Marshall, þingmaður Bjartrar framtíðar spyr hvort nýstofnað Þjóðaröryggisráð muni taka málið til skoðunar. Utanríkisráðherra segir að skoðað verði hvort ráðið verði kallað saman.

Í samtali við Reykjavík síðdegis á Bylgjunni segir Sigmundur að hann hafi ekki tilkynnt innbrotið til lögreglu því hann vissi af möguleikanum á tölvuinnbroti. Segir hann að honum hafi borist póstur sem var látinn líta úr fyrir að hafa komið frá manni sem hann þekkti.

„Mér barst póstur sem var látinn líta úr fyrir að hafa komið frá manni sem ég þekkti sem hafði svo ekki sent póstinn og í ljós kom að viðhengið sem var í honum var svona njósnaforrit til þess að fara inn í tölvu. Þetta kom í ljós eftir að ég fékk tæknimenn úr ráðuneytinu, eða rekstrarfélagi stjórnarráðsins, til þess að skoða tölvuna. Það er auðvitað ekkert hægt að átta sig á því hversu miklum upplýsingum viðkomandi hafði náð. Þeir sögðu mér bara að það eina örugga, fyrst þetta væri svona, væri að skipta um harða diskinn í tölvunni.“