Áttundi sigur 76ers í 10 leikjum | Myndband

Alls voru níu leikir í NBA-deildinni í körfubolta í nótt. Golden State Warriors hélt James Harden í skefjum og vann sinn 37. sigur í 43 leikjum og Philadelphia 76ers gerði sér lítið fyrir og vann sinn 8. sigur í 10 leikjum.

76ers hefur verið eitt lélegasta lið NBA síðustu ár en virðist loks vera að rétta úr kútnum. Liðið þokast upp töfluna eftir slakan árangur í upphafi leiktíðar en liðið lagði Portland Trail Blazers 93-92 í nótt og hefur nú unnið þrjá leiki í röð.

Robert Covington skoraði 22 stig fyrir 76ers auk þess að skora sigurkörfuna. Ersan Ilyasova var stigahæstur með 24 stig en stjarna liðsins Joel Embiid fór meiddur af leikvelli í seinni hálfleik. Embiid skoraði engu að síður 18 stig, tók 10 fráköst, gaf 5 stoðsendingar og varði fjögur skot. Damian Lillard skoraði 30 stig fyrir Trail Blazers.

Golden State Warriors tryggði sér öruggan 125-108 sigur á Houston Rockets með frábærum þriðja leikhluta sem liðið vann 37-22 eftir að hafa verið fimm stigum yfir í hálfleik.

Kevin Durant skoraði 32 stig fyrir Warriors og Stephen Curry 24 en liðinu tókst að halda James Harden stjörnu Houston í skefjum. Harden skoraði 17 stig og gaf 11 stoðsendingar en hitti ekki úr neinu af 5 þriggja stiga skotum sínum.



Úrslit næturinnar:

Philadelphia 76ers – Portland Trail Blazers 93-92

Charlotte Hornets – Toronto Raptors 113-78

Orlando Magic – Milwaukee Bucks 112-96

Memphis Grizzlies – Sacramento Kings 107-91

New Orleans Pelicans – Brooklyn Nets 114-143

Houston Rockets – Golden State Warriors 108-125

Atlanta Hawks – Chicago Bulls 102-93

Dallas Mavericks – Utah Jazz 107-112

Los Angeles Lakers – Indiana Pacers 108-96