NBA: Westbrook áfram í þrennustuði í nótt en fleiri voru líka með þrennu | Myndbönd

Russell Westbrook náði 27. þrennu sinni á tímabilinu í NBA-deildinni í körfubolta í nótt, Kyle Korver skoraði sína 2000. þriggja stiga körfu á NBA-ferlinum, Boston Celtics hélt sigurgöngu sinni áfram og Draymond Green var sendur í sturtu í sigri Golden State Warriors.

Russell Westbrook var með 38 stig, 14 fráköst og 12 stoðsendingar þegar Oklahoma City Thunder vann 116-105 sigur á New York Knicks. Þetta var 27. þrenna hans á leiktíðinni og hafa nú aðeins tveir leikmenn náð fleiri þrennum á einu NBA-tímabili. Oscar Robertson var með 41 þrennu 1961-62 og Wilt Chamberlain náði 31 þrennu 1967-68.

Victor Oladipo bætti við 21 stigi fyrir Thunderliðið en hjá New York var Carmelo Anthony með 30 stig og Derrick Rose skoraði 25 stig. New York skoraði 39 stig í fyrsta leikhluta og var þá tólf stigum yfir en Thunder snéri leiknum við í öðrum leikhluta og var sterkara liðið það sem eftir var.

LeBron James skoraði 31 stig og Kyrie Irving var með 26 stig þegar Cleveland Cavaliers vann 113-104 heimasigur á Indiana Pacers. Janúar var erfiður hjá meisturunum en liðið hefur nú unnið sjö af fyrstu átta leikjum sínum í febrúar.

Þetta var annars stórt kvöld fyrir Kyle Korver. Hann hitti úr 6 af 8 þriggja stiga skotum sínum og varð þar með sjöundi leikmaðurinn sem nær að skorað tvö þúsund þriggja stiga körfur í NBA-deildinni. Korver endaði með 22 stig á aðeins 25 mínútum.

Klay Thompson skoraði 35 stig í 109-89 sigri Golden State Warriors á nágrönnum sínum í Sacramento Kings eða meira en þeir Kevin Durant (21 stig) og Stephen Curry (13 stig) til samans. Golden State hefur unnið alla tólf leiki sína í vetur þar sem Klay Thompson er einn stigahæstur.

Stephen Curry hitti aðeins úr 2 af 8 þriggja stiga skotum sínum en gaf 9 stoðsendingar. Klay Thompson skoraði sjö þrista og skoraði stigin sín 35 á 31 mínútu. Durant var með 21 stig, 7 fráköst, 7 stoðsendingar og 4 varin skot á 32 mínútum.

Draymond Green lék aðeins í fimmtán mínútur en hann fékk tvær tæknivillur og var rekinn í sturtu í öðrum leikhluta. Það háði ekki Golden State sem gerði út um leikinn með 28-2 spretti í þriðja leikhlutanum.

Glenn Robinson III skoraði mest fyrir Indiana eða 19 stig en þetta var fimmti tapleikur liðsins í röð. Jeff Teague var með 15 stig og 11 stoðsendingar og Myles Turner skoraði líka 15 stig.

Isaiah Thomas skoraði 13 af 33 stigum sínum í fjórða leikhluta þegar Boston Celtics vann 116-108 sigur á Philadelphia 76ers. Þetta var fjórði sigur Boston í röð og sá ellefti í tólf leikjum.

Þeta var fertugasti leikurinn í röð sem Isaiah Thomas skorar 20 stig eða fleiri og hann jafnaði þar með félagsmet John Havlicek frá 1971-72 tímabilinu.

Marcus Smart bætti við 21 stigi og 8 stolnum boltum fyrir Boston-liðið en Dario Saric var atkvæðamestur hjá Philadelphia með 20 stig og 11 fráköst og Robert Covington skoraði 18 stig.

James Harden var með þrennu fyrir Houston Rockets, 38 stig, 12 fráköst og 12 stoðsendingar, sína fimmtándu á leiktíðinni en það dugði ekki til sigurs því Houston tapaði 117-109 á heimavelli á móti Miami Heat.

Miðherjinn Hassan Whiteside var með 23 stig, 14 fráköst og 5 varin skot fyrir Miami og Dion Waiters bætti við 23 stigum. 9 fráköstum og 7 stoðsendingum. Miami endaði tveggja leikja taphrinu sem kom í kjölfarið á tólf leikja sigurgöngu liðsins.

Eric Bledsoe var með þrennu fyrir Phoenix Suns þegar liðið vann 137-101 sigur á Los Angeles Lakers. Bledsoe endaði með 25 stig, 13 stoðsendingar og 10 fráköst. Devin Booker skoraði 23 stig en hjá Lakers voru þeir Lou Williams og D'Angelo Russell báðir með 21 stig.

Giannis Antetokounmpo skoraði 33 stig og bætti við 9 fráköstum, 4 stolnum boltum og 3 stoðsendingum þegar Milwaukee Bucks vann 129-125 sigur á Brooklyn Nets. Þetta bar fjórtánda tap Brooklyn-liðsins í röð. Greg Monroe var með 25 stig fyrir Bucks og Khris Middleton skoraði 20 stig. Brook Lopez var atkvæðamestur hjá Brooklyn með 36 stig.

Andrew Wiggins skoraði 40 stig og Karl-Anthony Towns var með 24 stig og 18 fráköst þegar Minnesota Tomberwolves vann 112-99 sigur á Denver Nuggets. Þetta var annar 40 stiga leikur Andrew Wiggins á 24 tímum en Denver-liðið náði ekki að fylgja eftir sigri á Golden State Warriors í leiknum á undan.  

LaMarcus Aldridge gerði 23 stig og Kawhi Leonard  bætti við 22 stigum þegar San Antonio Spurs vann 107-79 útisigur á Orlando Magic.

Öll úrslit í NBA-deildinni í nótt:

Golden State Warriors - Sacramento Kings    109-86    

Los Angeles Clippers - Atlanta Hawks    99-84    

Oklahoma City Thunder - New York Knicks    116-105    

Denver Nuggets - Minnesota Timberwolves    99-112    

Phoenix Suns - Los Angeles Lakers    137-101    

Utah Jazz - Portland Trail Blazers    111-88    

Houston Rockets - Miami Heat    109-117    

Memphis Grizzlies - New Orleans Pelicans    91-95    

Boston Celtics - Philadelphia 76ers    116-108    

Brooklyn Nets - Milwaukee Bucks    125-129    

Detroit Pistons - Dallas Mavericks    98-91    

Toronto Raptors - Charlotte Hornets    90-85    

Cleveland Cavaliers - Indiana Pacers    113-104    

Orlando Magic - San Antonio Spurs    79-107