Stuðningsmenn Inter gengu út

Harðkjarnastuðningsmenn ítalska liðsins Inter fóru heim eftir aðeins 25 mínútur í leik liðsins um helgina.

Það var gert í mótmælaskyni en stuðningsmennirnir eru mjög ósáttir við reksturinn á félaginu.

Stefano Pioli var rekinn sem þjálfari liðsins á þriðjudag en hann er annar þjálfarinn sem fær að fjúka í vetur.

Staðan var enn 0-0 er stuðningsmennirnir gengu út. Þeir skildu eftir stóran borða með skýrum skilaboðum.

„Þið eigið ekki skilið okkar stuðning. Við komum bara til þess að segja hæ. Nú erum við farnir í hádegismat,“ stóð á borðanum.

Ekki fóru þessar aðgerðir vel í lið Inter sem tapaði leiknum, 1-2. Inter í áttunda sæti ítölsku úrvalsdeildarinnar.