Redknapp verður áfram hjá Birmingham

Knattspyrnustjórinn Harry Redknapp skrifaði í morgun undir nýjan samning við Birmingham.

Nýi samningurinn er til eins árs. Hinn sjötugi Redknapp stýrði Birmingham í síðustu þrem leikjum tímabilsins í ensku B-deildinni og náði að bjarga liðinu frá falli.

Hann gerði afar sérstakan samning við Birmingham er hann tók við liðinu. Hann myndi aðeins fá greitt fyrir vinnu sína ef honum tækist að bjarga liðinu frá falli. Það gerði kallinn auðvitað.

Birmingham vann síðustu tvo leiki sína og bjargaði sér. Það er því eðlilega mikil ánægja með Redknapp sem fær að stýra liðinu næsta vetur.