Ingvi Björn snýr aftur sem eigandi hjá Deloitte

Ingvi Björn Bergmann hóf um mánaðarmótin störf á endurskoðunarsviði Deloitte og varð þá jafnframt einn af eigendum fyrirtækisins.

Í tilkynningu frá Deloitte segir að Ingvi Björn hafi undanfarin tvö ár starfað sem fjármálastjóri Kynnisferða.

„Áður en Ingvi Björn gekk til liðs við Kynnisferðir hafði hann starfað hjá Deloitte frá árinu 2004, þar af sem eigandi frá árinu 2013, en árin 2010-2012 starfaði Ingvi Björn hjá Deloitte í Kaupmannahöfn,“ segir í tilkynningunni. 

Þorsteinn Pétur Guðjónsson, sviðsstjóri endurskoðunarsviðs Deloitte, segir mikla ánægju með að fá Ingva Björn aftur í eigendahóp Deloitte. „Ingvi Björn hefur undanfarin ár viðað að sér reynslu innan ferðaþjónustunnar, sem er orðin ein af undirstöðugreinum landsins. Þar innanborðs er fjölbreyttur hópur fyrirtækja af öllum stærðum og gerðum sem mikilvægt er að styðja vel við bakið á,“ segir Þorsteinn Pétur.