Albert ánægður með liðsfélagana sem teiknuðu upp seinna mark Íslands fyrir leik

Albert Guðmundsson, fyrirliði landsliðsins og leikmaður PSV var besti maður u-21 liðs karla í kvöld þegar liðið mátti þola tap gegn Albaníu í undankeppni fyrir EM 2019. Hann var í framlínu liðsins en fékk að mörgu leyti frjálst hlutverk í leiknum.

„Þetta var helvíti fúlt. Við tókum það samt fram að við ætluðum ekkert að vera að hugsa um það,“ segir Albert í samtali um Vísi um jöfnunarmark Albana sem kom aðeins nokkrum sekúndum eftir að Ísland komst yfir í blálok fyrri hálfleiks.

„Við töluðum um að nýta okkur þetta sem jákvæðan punkt, til þess að halda okkur á tánum og vilja fá sigurinn enn þá meira en því miður tókst það ekki,“ segir Albert.

Albert lagði upp seinna mark Íslands með afar vel útfærðri aukaspyrnu sem æfð var vel í gær fyrir leikinn. Tryggvi Hrafn Haraldsson þóttist ýta boltanum áður en Albert gaf boltann fyrir. Við þetta fipaðist vörn Albana og var Viktor Karl Einarsson skilinn eftir galopinn á fjærstöng.

Albert hrósar liðsfélögum sínum fyrir að hafa útfært þetta svona vel.

„Ég er virkilega ánægður með að við náðum að útfæra þetta svona vel. Ég vil hrósa strákunum líka, við teiknuðum þetta upp sjálfir,“ segir Albert sem hrósaði líka þjálfurunum fyrir fyrra markið sem kom eftir horn eftir uppskrift þjálfaranna.

Albert segir að vantað hafi herslumuninn í leiknum og að með smá heppni hefði leikurinn fallið Íslands megin.

„Við náum ágætis stöðum á vellinum en þá vantaði örlitla, kannski einn mann örlítið meira í boxinu eða sendingin kannski örlítið betri. Það er fullt af hlutum sem við þurfum að laga en fullt af hlutum sem við getum verið ánægðir með,“ segir Albert.

Albert var sem fyrr segir í frjálsu hlutverki og var oftar en ekki kominn á miðjuna til að stýra spilinu og finna pláss. Hann var einnig mættur í vörnina á 93. mínútu og kom í veg fyrir hættulegt færi hjá gestunum.

„Mér fannst í þessum leik að það væru svæði fyrir mig að detta í og ég ákvað að notfæra mér það bara og fannst það ágætlega ganga upp,“ segir Albert.

En fær hann að gera þetta hjá PSV?

„Nei, þar er ég bara að fá boltann í lappir fram á við.“