Veittist að starfsfólki slysadeildar

50 mál komu á borð lögreglunnar á höfuðborgarsvæðinu í nótt og eru allar fangageymslur fullar nú í morgunsárið.

Um klukkan hálf eitt í nótt var tilkynntum eld í íbúð í Austurbrún. Íbúðin var reykræst en ekki er talið að miklar skemmdir séu á íbúðinni vegna reiksins.

Klukkan tvö í nótt var aðili fluttur með sjúkrabíl á slysadeild landspítala vegna lasleika. Þegar þangað var komið setti viðkomandi hnefana fyrir sig og veittist að starfsfólki slysadeildarinnar. Aðilinn var handtekinn og vistaður í fangageymslu.

Laust fyrir klukkan eitt í nótt var tilkynnt um árekstur á Bústaðavegi þar sem bíl hafði verið ekið á vegrið. Ökumaðurinn var farinn af vettvangi þegar lögregluna bar að. Vopn fundust við leit í bifreiðinni sem og fíkniefni. Þá var aðili handtekinn rétt fyrir hálf tólf í gærkvöldi á Laugavegi eftir að hafa ekið á bíl og ekið af vettvangi. Maðurinn var handtekinn stuttu síðar en hann reyndist ölvaður og án ökuréttinda.

Þá var aðili handtekinn klukkan korter í tvö grunaður um innbrot í fyrirtæki og verður hann yfirheyrður seinna í dag.

Þá stöðvaði lögreglan bifreið á Vesturlandsvegi klukkan 02:43 eftir að hraði hennar mældist 128 km/klst þar sem hámarkshraði var 80 km/klst. Bíllinn reyndist líka vera ótryggður svo að skráningarnúmer bílsins voru fjarlægð.

Þá var kona handtekinn í Bankastræti í nótt eftir að hafa slegið dyravörð á skemmtistað í miðborginni. Hún gistir fangageymslu þar til unnt er að yfirheyra hana síðar í dag.

Fjórir aðilar voru handteknir grunaðir um akstur undir áhrifum fíkniefna og þá var maður handtekinn í vesturbæ Reykjavíkur rétt fyrir klukkan sex í morgun með umtalsvert magn af fíkniefnum sem grunur er á að hafi verið ætlaður til sölu. Málið er nú til rannsóknar hjá lögreglu.