Fimm marka tap hjá Val í fyrri leiknum

Valsmenn töpuðu fyrri leiknum gegn unverska liðinu Balatonfuredi í Ungverjalandi í dag, 27-22 í EHF-bikarnum í handbolta.

Valsmenn voru átta mörkum undir í hálfleik, 16-8, en náðu aðeins að þétta raðirnar í síðari hálfleik og saxa niður forskot Ungverjana.

Lokatölur urðu eins og áður segir fimm marka tap, 27-22, en báðir leikirnir eru leiknir ytra. Sá síðari fer fram á morgun og það verður heimaleikur Vals.

Stanislav Kasparek skoraði sex mörk fyrir Ungverjana og var markahæstur, en Magnús Óli Magnússon gerði fimm mörk fyrir Val. Næstir komu Anton Rúnarsson og Orri Freyr með þrjú mörk hvor.