Nafnlaust símtal og rússneskur leyniþjónustumaður

Fréttamaður á vegum hinna bresku Cambridge Evening News fékk nafnlaust símtal árið 1963 þar sem honum var ráðlagt að hafa samband við sendiráð Bandaríkjanna þar sem nálgast mætti stórar fréttir. Um 25 mínútum síðar var John F. Kennedy, þáverandi Bandaríkjaforseti, skotinn til bana í Dallas.

Þetta kemur fram í þeim 2900 gögnum um morðið á Kennedy sem gerð voru opinber í gær í samræmi við bandaríska upplýsingalöggjöf. 

Donald Trump Bandaríkjaforseti dró þó nokkuð í land frá því sem fyrst var talið, því hann hélt eftir um tíu prósentum þeirra skjala sem um var að ræða. Það gerði hann eftir þrýsting frá CIA, FBI og innanríkisráðuneytinu og ákvað að þau skjöl skyldu skoðuð betur og innan sex mánaða verði tekin ákvörðun um það sem eftir er. 

Lítið nýtt er að finna í skjalabunkanum sem nú er fram kominn og raunar hafði verið greint frá þeim flestum með einum eða öðrum hætti í gegnum árin. Samsæriskenningar hafa verið uppi allt frá því Kennedy var myrtur og víst er að aflétting leyndarinnar í gær mun lítið gera til að draga úr þeim. Árið 1992 samþykkti Bandaríkjaþing að allri leynd af öllum skjölum er varði morðið skyldi aflétt þann 26. október 2017, eða í gær. Trump sagði við tilefnið að hann hafi ekki átt neinn annan kost en að halda leynd áfram á hluta skjalanna, annars gæti það alvarleg og óafturkræf áhrif á öryggi ríkisins.

Rannsóknin gríðarlega víðfem

Í gögnunum má til að mynda sjá minnisblað yfirmanns hjá alríkislögreglunnar þar sem fyrrgreinds símtals er getið. Hvorki fréttamaðurinn né innhringjandinn er nafngreindur á minnisblaðinu, sem dagsett er fjórum dögum eftir morðið. Er til marks um hversu víðfem rannsókn lögreglunnar á morðinu var, að mati útlneskra fjölmiðla.

Í minnisblaðinu stendur: „Breska leyniþjónustan (MI-5) greinir frá því að klukkan 18:05 að staðartíma þann 22. nóvember hafi ónafngreindur einstaklingur í Cambridge, Englandi, hringt í háttsettan fréttamann hjá Cambridge News. Það eina sem innhringjandinn sagði var að fréttamaðurinn ætti að hafa samband við bandaríska sendiráðið í Lundúnum til að nálgast stórar frétt og lagði svo á. Hafði fréttamaðurinn svo samband við lögregluna og tilkynnti um símtalið, eftir að fréttir höfðu borist af dauða forsetans,“ eins og segir á vef Guardian.

Þá greinir CNN frá minnisblaði fulltrúa CIA, sem ritað var daginn sem Kennedy var skotinn, þar sem segir frá símtali morðingjans, Lee Harvey Oswald, við fulltrúa rússnesku leyniþjónustunnar, KBG.

Á hann að hafa rætt við fulltrúann, Valeriy Vladimirovich Kostikov, á „bjagaðri rússnesku.“ Var Oswald í Mexíkó en Kostikov starfaði í rússneska sendiráðinu í höfuðborg landsins. Talið er að Oswald hafi verið staddur þar í landi til að fá aðstoð við að útvega sér vegabréf eða vegabréfsáritun.