Hann segir Pressumálið ekki flókið í sínum augum. Hann og fleiri hafi glatað töluverðum fjármunum vegna þátttöku sinnar í félaginu og sjái eftir því.
Eignarhaldsfélagið Dalurinn, skipað þeim Árna Harðarsyni, Halldóri Kristmannssyni, Hilmari Þór Kristinssyni, Jóhanni G. Jóhannssyni og Róberti Wessmann, fjárfesti í 68 prósent hlut Pressunnar fyrr á þessu ári.
Árni sakar Björn Inga um að hafa haft í hótunum við sig vegna fyrirhugaðs hluthafafundar um kosningu nýrrar stjórnar Pressunnar. Árni segir að hann hafi hótað því að fara í fjölmiðlaherferð gegn sér og Róberti Wessmann færi sú kosning fram.
Hann segir þetta ekki eina skiptið sem Björn Ingi hefur hótað sér og fer hann hörðum orðum um hann.
„Þau greinaskrif sem hann stendur í núna koma mér því ekki á óvart, enda maðurinn í mínum huga, eftir kynni mín af honum sem stjórnanda Pressunnar, siðlausasti einstaklingur sem ég hef haft afskipti af.“
Sakar nýja stjórn um „hreinan hefndarleiðangur“
Björn Ingi hóf í síðustu viku skrif svokallaðra rammapistla í Morgunblaðinu þar sem hann hyggst greina frá atburðarásinni frá því að nýir eigendur tóku yfir meirihluta Pressunnar þangað til að félagið var tekið til gjaldþrotaskipta nú um daginn.
Í samtali við Vísi síðastliðinn föstudag sagði Björn Ingi nýja stjórn fara fram í fjölmiðlum með „hreinum hefndaraðgerðum“.
„Já ég held bara að þeir séu að reyna að koma illu til leiðar, ef svo má segja. Það hefur komið fram opinberlega og annars staðar að ég er í persónulegri ábyrgð og öðru slíku svo það lendir þá á mér. Ég get ekki séð annað en að þetta séu hreinar hefndaraðgerðir og verði þeim að góðu sem standa fyrir þeim,“ sagði Björn Ingi.
Uppfært kl. 15:07
Björn Ingi Hrafnsson tjáði sig um orð Árna á Facebook-síðu sinni fyrir skömmu. Þar segir hann Árna ekki svara einni framkominni ásökun heldur hafi þess í stað haft hin verstu orð um sig. Auk þess sakar hann Árna um að fara í manninn en ekki boltann og það geri þeir „sem hafi jafnan vondan málstað að verja“.
