Ásmundur leggur einkabíl sínum

Ásmundur Friðriksson, þingmaður Sjálfstæðisflokksins, hefur ákveðið að skipta yfir á bílaleigubíl og hætta að aka um sitt kjördæmi á KIA-jepplingi sínum.

Málefni Ásmundar og reyndar aksturspeningar Alþingismanna hafa verið mjög í deiglunni eftir að í ljós kom að sá sem sótti um endurgreiðslu vegna kostnaðar við akstur fór hæst í 4,6 milljónir króna fyrir árið 2017. Sá sem næstur kom fékk um 3 og hálfa milljón og sá þriðji um þrjár komma eina, en greiðslur til þeirra 10 sem mest fengu námu um 29 milljónum króna. Seinna kom á daginn að Ásmundur var aksturskonungurinn og nú ætlar hann að skipta yfir á bílaleigubíl.

Í starfsreglum Alþingis kemur fram að aki þingmenn meira en 15 þúsund kílómetra á ári skuli hann fá til afnota bílaleigubifreið sem skrifstofa Alþingis leggi til. Ásmundur ók um 47 þúsund kílómetra á síðasta ári.

Hart hefur verið sótt að Ásmundi vegna málsins á umliðnum dögum meðan aðrir hafa varið hann svo sem flokksbræður hans Páll Magnússon og Brynjar Níelsson auk Ingva Hrafns Jónssonar sjónvarpsmanns sem segist aldrei hafa fyrirhitt annan eins dugnaðarfork og Ásmund.

„Þetta hefur staðið til lengi. Það hafa verið þingmenn sem hafa verið í viðræðum við forsætisnefndina um þessi bílamál. Þessar nýju reglur voru settar af henni í þinglok fyrir síðustu kosningar. Ekkert samráð var haft við okkur sem erum í þessu heimakeyrsluverkefni,“ segir Ásmundur.

Veit ekki hverjir eru í 2., 3., 4. og 5. sæti

Hann segist hafa boðið þeim að leigja þinginu bílinn sinn á þeim sömu kjörum og bjóðast af bílaleigum sem leggja þingmönnum til bíla. En Alþingi skiptir við Bílaleigu Akureyrar. „En þeir vildu það ekki,“ segir Ásmundur.

Af hverju ekki?

„Þeir verða að svara því. Þetta er langt síðan.“

En, veistu hverjir eru næstir á lista á eftir þér yfir hina akstursglöðu þingmenn?

„Nei. Ég hef ekki hugmynd um það. Ég á nóg með sjálfan mig í þessu.“

Óánægja með þjónustu bílaleigunnar

Ásmundur var á leið í sjónvarpsviðtal þegar blaðamaður Vísis heyrði í honum en hann ræddi þetta mál við Eirík Jónsson blaðamann og sagði við það tækifæri að nú væri nóg komið. Í frétt Eiríks kemur fram að Ásmundur muni greina frá þessari ákvörðun sinni á þingi við fyrsta tækifæri.

„Mér finnst eðlilegt að ég fái sambærilegan bíl og ég hef verið á,“ segir Ásmundur í samtali við Eirík Jónsson.

Uppfært 17:30

Í eldri útgáfu fréttarinnar kom fram að nokkur óánægja hafi verið meðal þingmanna sem nýtt hafa sér þjónustu Bílaleigu Akureyrar „en þeir telja að afgangsbílar hafi verið þeim ætlaðir,“ og var þar vísað til þess er fram kom í frétt Eiríks Jónssonar. Ásmundur setti sig samband við fréttastofu og segir þetta ekki fá staðist og því vert að fella út það sem segir um hina meintu óánægju þingmanna með bílaleigubíla. Hefur fréttinni verið breytt til samræmis við það.