Breyta framburði sínum í stóra Instagram-kókaín málinu

Tveir kanadískir ríkisborgarar hafa játað að hafa reynt að smygla umtalsverðu magni kókaíns til Ástralíu með skemmtiferðaskipi árið 2016. Málið vakti mikla athygli og gerði Vísir því greinargóð skil á sínum tíma.

Sjá einnig: Reyndu að smygla 100 kílóum af kókaíni til Ástralíu með skemmtiferðaskipi og birtu myndir úr ferðinni á Instagram

Þegar málið kom fyrst upp voru þrír Kanadamenn handteknir í aðgerðum lögreglunnar, tvær konur og einn karl. Hin 23 ára gamla Melina Roberge og Andre Tamine, karlmaður á sjötugsaldri, neituðu upphaflega að hafa átt nokkurn þátt í því að flytja kókaínkílóin 95 til Sydney um borð í skemmtiferðaskipinu MS Sea Princess um mitt ár 2016. 

Þau hafa hins vegar breytt framburði sínum og játað á sig sök. Búast má við því að réttarhöld yfir þeim hefjist í næstu viku.

Hin konan, hin liðlega þrítuga Isabelle Lagacé, var dæmd fyrir aðild sína að málinu í nóvember síðastliðnum. Hún hlaut sjö og hálfs árs fangelsisdóm og háa fjársekt.

Verðmæti fíkniefnanna er talið nema um 1,7 milljörðum íslenskra króna og er um að ræða mesta magn sem ástralska lögreglan hefur lagt hald á, á skipi eða bát, í einu og sömu aðgerðinni.

Það sem vakti einna mesta athygli við málið er að þær Lagacé og Roberge birtu myndir úr fíkniefnaferðinni á Instagram. Á myndunum sjást þær í miklu stuði á þessari sjö vikna löngu siglingu, frá Southampton í Englandi til Sydney.

Þegar skipið kom svo til hafnar í Ástralíu runnu hins vegar á þær tvær grímur þegar lögregluhundar þefuðu uppi kókaínið. Þær höfðu geymt um 35 kíló í káetunni sinni en hin 60 kílóin fundust í káetu Tamine.

Sem fyrr segir mega Roberge og Tamine búast við því að hljóta dóm síðar á þessu ári.