Rockets jafnaði metin gegn Warriors

Houston Rockets ætlar ekkert að láta meistara Golden State Warriors valta yfir sig í úrslitaeinvígi Vesturdeildar NBA-deildarinnar. Annar leikur liðanna fór fram í nótt og Rockets gerði sér lítið fyrir og pakkaði Warriors saman, 127-105.

James Harden skoraði 27 stig og tók 10 fráköst fyrir Houston í nótt. Eric Gordon var einnig með 27 stig og PJ Tucker bætti 22 við. Kevin Durant var allt í öllu hjá Warriors með 38 stig en allir aðrir leikmenn Warriors einfaldlega fundu sig ekki í leiknum.

Stephen Curry var eini leikmaður liðsins fyrir utan Durant sem komst yfir tíu stigin í leiknum en hann gat samt ekki neitt. Curry var með 16 stig og hitti aðeins úr 7 af 19 skotum sínum.

Curry hefur verið mikið meiddur í vetur og margir óttast að hann sé enn að glíma við meiðsli. Sjálfur neitar hann því.

„Mér líður frábærlega en ég er bara ekki að finna taktinn,“ sagði Curry.