Afturelding semur við lettneskan landsliðsmann

Handknattleiksdeild Aftureldingar hefur gert þriggja ára samning við lettneska landsliðsmanninn Emils Kurzimniesk. Þetta staðfestir Einar Andri Einarsson, þjálfari Aftureldingar við Vísi.

Emils kemur til Aftureldingar frá lettnesku meisturunum í Tenax. Hann leikur í stöðu vinstri skyttu, er fæddur árið 1998 og 192 sentimetrar á hæð.

Emils lék 12 leiki Tenax á síðustu leiktíð og var fjórði markahæsti leikmaður liðsins með 32 mörk.

Afturelding lítur á Emils sem framtíðarmann og verður honum gefinn tími til að aðlagast nýju umhverfi í íslensku deildinni.