Grindavík hafði betur gegn Eyjamönnum

Grindavík vann ÍBV í annari umferð riðlakeppni Fótbolta.net mótsins í dag.

Aron Jóhannsson skoraði fyrsta mark leiksins fyrir Grindvíkinga en leikið var í Reykjaneshöllinni í dag. Dagur Ingi Hammer Gunnarsson bætti öðru markinu við áður en fyrri hálfleikurinn var úti og Grindvíkingar í vænlegri stöðu.

ÍBV minnkaði muninn úr vítaspyrnu á 86. mínútu, Jonathan Franks fór á punktinn og skoraði. Eyjamenn náðu ekki að setja jöfnunarmarkið og voru 2-1 lokatölur.

Grindvíkingar eru líkt og Breiðablik með fjögur stig eftir tvo leiki. Liðin mætast um næstu helgi í úrslitaleik um toppsætið.

Upplýsingar um markaskorara og úrslit eru fengnar frá Fótbolta.net.