Hjúkrunarfræðingurinn neitar að hafa nauðgað konunni

Hjúkrunarfræðingur sem ákærður er fyrir að hafa nauðgað alvarlega þroskaskertri konu á hjúkrunarheimili í Phoenix í Arizona í Bandaríkjunum, með þeim afleiðingum að hún ól barn í desember, neitaði sök í málinu í gær.

Málið hefur vakið mikinn óhug í Bandaríkjunum en heilastarfsemi konunnar er afar takmörkuð. Hún er 29 ára og hafði legið á Hacienta-hjúkrunarheimilinu í tíu ár.

Sjá einnig: „Við höfðum ekki hugmynd um að hún væri ólétt“



Nathan Sutherland, 36 ára hjúkrunarfræðingur sem starfaði á stofnuninni, var ákærður fyrir að hafa nauðgað konunni eftir að lífsýni sem tekin voru af öllum karlkyns starfsmönnum voru talin sýna fram á sekt hans. Sutherland var leiddur fyrir dómara í gær og neitaði þar sök en hann hefur verið í haldi lögreglu síðan í janúar.

Lögmaður Sutherland heldur því fram að saksóknara skorti sönnunargögn í málinu gegn skjólstæðing sínum. Þá hyggst hann fara fram á aðra lífsýnarannsókn.

Sveinbarnið sem konan ól er við góða heilsu í umsjá fjölskyldu móður sinnar. Komið hefur fram að starfsfólk hjúkrunarheimilisins hafði ekki hugmynd um að konan væri ólétt fyrr en hún byrjaði að fæða barnið.