Talið að maður sem drukknaði hafi siglt á staur

Rannsóknarnefnd samgönguslysa telur líklegt að maður sem drukknaði í sjónum við Vatnagarða í Reykjavík í fyrra hafi siglt slöngubát sínum á staur. Maðurinn var á sextugsaldri en hann fannst látinn að morgni 20. apríl í fyrra. Samkvæmt skýrslu rannsóknarnefndar var maðurinn ekki í björgunarvesti og ölvaður. 

Maðurinn hafði verið að fara yfir vélbúnað bátsins og sjósett hann eftir vetrargeymslu. Eftir sjósetningu fór hann í prufusiglingu rétt fyrir miðnætti 19. apríl í fyrra á bátnum frá Snarfahöfn og um Kleppsvíkina. Menn sem þekktu til viðgerðaraðilans fóru að lengja eftir honum og hófu að svipast um eftir honum um stund á bátalæginu og við viðlegukanta þegar hann hafði ekki skilað sér. Fóru þeir síðan til leitar á bát út frá Snarfarahöfn og fundu þeir bátinn mannlausan í gangi við bryggju Samskipa við Vogabakka.

Höfðu þeir þá samband við lögreglu en þá var kl. 01:17. Nokkrar ákomur voru á bátnum og slöngur rifnar að framan. Leit var þegar hafin að bátsverjanum og fannst hann látinn í sjónum um kl. 05:15 u.þ.b. 200 metra frá landi og talsvert vestar frá siglingasvæði hans. Útfall var á svæðinu þegar og eftir að atvikið varð.

Á siglingunni er líklegt að báturinn hafi lent utan í staur - ljósmerki áður en hann breytir um stefnu og stöðvast við bryggjuna á Vogabakka.Ekki er fullvíst hvar bátsverjinn féll fyrir borð en líklegt að það hafi verið við staurinn, að því er fram kemur í skýrslu rannsóknarnefndarinnar. 

Við rannsókn málsins kom fram að þegar að var komið fannst bifreið hins látna í ganga á athafnasvæði Snarfara. Þegar báturinn fannst mannlaus við Vogabakka voru yfirbreiðslur yfir sætum og hlífðarglugga á mælaborði.

Við skoðum var ljóst að bátsverjinn hefði þurft að hafa hendur á stjórntökum og stýri undir yfirbreiðslunni. Til að sjá yfir yfirbreiðsluna á siglingunni hefði hann jafnframt orðið að standa við stjórntökin.Rannsóknin leiddi einnig í ljós að maðurinn var ekki í björgunarvesti á siglingu en samkvæmt krufningarskýrslu var dánarorsök hans drukknun en einnig kom fram í skýrslunni að hann hafi verið ölvaður.