Segir Ísland sitja í súpunni vegna óbilgirni ESB og ásóknar heildsala

Samgöngu- og sveitarstjórnaráðherra segir frumvarp landbúnaðaráðherra, sem meðal annars heimilar innflutning á fersku kjöti, vera til marks um að íslensk stjórnvöld séu að gefa sig undan þrýstingi heildsala og Evrópusambandsins. Hann er ekki tilbúinn að svo stöddu að segja til um það hvort Framsóknarflokkurinn muni styðja frumvarpið.

Frumvarp Kristjáns Þórs Júlíussonar var birt í samráðsgátt stjórnvalda í gær en þar er kveðið á um afnám núverandi leyfisveitingakerfis vegna innflutnings á landbúnaðarafurðum innan evrópska efnahagssvæðisins. Frumvarpinu er meðal annars ætlað að bregðast við áhrifum dóma EFTA-dómstólsins og Hæstaréttar Íslands sem fallið hafa gegn íslenska ríkinu vegna þeirra innflutningshafta sem ríkja í núgildandi löggjöf.

Sjá einnig: Vill leyfa innflutning á hráu kjöti frá byrjun sláturtíðar

Félag atvinnurekenda fagnar frumvarpinu og segir það löngu tímabært. Íslensk stjórnvöld geti ekki lengur farið á svig við alþjóðlegar skuldbindingar. Sindra Sigurgeirssyni, formanni Bændasamtakanna, hugnast aftur á móti ekki hið boðaða frumvarp.

„Ég hef skilning á því að menn geta ekki endalaust brotið lög en það hlýtur að vera hægt að fara og semja,“ segir Sindri.

„Við náttúrlega búum á eyju þar sem að við erum með einangraða búfjárstofna og höfum alveg einstaka stöðu. Við erum með mikinn hreinleika í íslenskum landbúnaði, lægstu sýklalyfjanotkun í veröldinni þannig að við höfum einstaka stöðu og það er mjög eðlilegt að við verjum hana eftir fremsta megni,“ svarar Sindri þegar hann er spurður hvort það sé ekki ósanngjörn krafa að vilja flytja út íslenskar landbúnaðarafurðir en á sama tíma hefta innflutning.

Hugsanlega stærsta pólitíska umræða næstu áratuga

Sigurður Ingi Jóhannsson, samgöngu- og sveitarstjórnarráðherra, segir Ísland vera í sérstöðu til að verjast þeirri ógn sem hann segir að blasi við vegna hugsanlegs sýklalyfjaónæmis. Frumvarpið taki ekki nógu vel á þeim þætti.

„Óbilgirni Evrópusambandsins og ásókn íslenskra heildsala og stóru matvælafyrirtækjanna í Evrópu um að græða peninga og vera nokk sama um heilsufar manna og dýra veldur því að við sitjum í þessari súpu,“ segir Sigurður Ingi. Hann kveðst skilja þá stöðu sem landbúnaðarráðherra sé í en segir að þingið verði að skoða málið vel þegar þar að kemur. 

Spurður hvort Framsóknarflokkurinn muni styðja frumvarpið segir hann of snemmt að segja til um það. „Við munum, og höfum lýst efasemdum um að þetta sé nóg þannig að við munum örugglega leitast leiða við það. Nú er þetta í samráðsgátt, þetta hefur ekki komið fyrir ríkisstjórn, þannig að það er nú kannski full fljótt að vera að ræða um stuðning við einstaka greinar í einhverju frumvarpi sem er ekki komið fram,“ segir Sigurður Ingi. 

Hann ítrekar sérstöðu Íslands hvað varðar það að geta varist því sem hann kallar sýklalyfjaónæmisógn. „Þetta gæti orðið stærsta pólitíska umræða næstu áratuga og ég er hræddur um að ef við tökum ekki á henni núna að þá muni fólk eftir 20-30 ár velta fyrir sér hvaða hagsmuni voru menn að verja í kringum 2019?“ segir Sigurður Ingi.