Oddur markahæstur enn eina ferðina

Balingen-Weilstetten vann enn einn leikinn í þýsku B-deildina er liðið vann fjórtán marka sigur, 36-22, á HC Rhein Vikings.

Það var ljóst frá upphafi í hvað stefndi en Balingen tók fljótlega forystuna og var átta mörkum yfir í hálfleik. Sigurinn aldrei í hættu.

Oddur Grétarsson var einu sinni sem oftar frábær í liði Balingen en hann skoraði tíu mörk. Hann var markahæsti leikmaður vallarins en sjö mörk komu úr vítaköstum.

Balingen er á toppi deildarinnar með 46 stig, fimm stigum á undan Coburg, sem á þó leik til góða gegn Emstdetten á morgun.