Bandaríkin sögð ætla að selja Taívan orrustuþotur

Ríkisstjórn Donald Trump, forseta Bandaríkjanna, hefur gefið ríkisstjórn Taívan leyfi til að kaupa rúmlega 60 orrustuþotur af gerðinni F-16. Líklegt þykir að ákvörðunin muni reita Kínverja til reiði en ríkin eiga nú í umfangsmiklum viðskiptaerjum. Bandaríkin hafa ekki selt Taívan orrustuþotur frá 1992.

Einhverjir heimildarmenn Bloomberg segja ríkisstjórn Taívan einnig vilja kaupa skriðdreka. Starfsmenn Hvíta hússins vildu ekki tjá sig um málið og Varnarmálaráðuneyti Taívan segist ekki hafa fengið opinbert svar frá Bandaríkjunum við beiðni þeirra.

Bloomberg hefur heimildir fyrir því að ráðgjafar Trump hafi hvatt ríkisstjórn Taívan til að óska formlega eftir orrustuþotum, sem þeir hafa nú gert. Beiðnin þarf þó að vera samþykkt af Varnarmálaráðuneyti Bandaríkjanna og Utanríkisráðuneytinu og í kjölfar þess hefur fulltrúadeild Bandaríkjaþings 30 daga til að koma í veg fyrir söluna, sé vilji til þess.



Bandaríkin höfðu hafnað beiðni ríkisstjórnar Taívan um að kaupa nýjar F-35 orrustuþotur.

Hafa sífellt meiri áhyggjur af innrás Kínverja

Kínverjar hafa gert tilkall til Taívans allt frá árinu 1949 þegar leiðtogar lýðveldissinna í Kína flúðu þangað undan kommúnistum og stofnuðu þar ríki, sem þeir kölluðu, og kalla raunar enn, Lýðveldið Kína. Afar grunnt hefur verið á því góða á milli ríkjanna allar götur síðan.

Árið 1972 tóku Bandaríkin upp stefnu sem nefnist „Eitt Kína“. Það var gert eftir fund Richard Nixon og Mao. Sendiráði Bandaríkjanna í Taívan var lokað árið 1979. Bandaríkin hafa þó alla tíð síðan átt í nánum óopinberum samskiptum við yfirvöld í Taipei. Ríkin hafa gert varnarsáttmála og Bandaríkin útvega Taívan vopn.

Forsvarsmenn herafla Bandaríkjanna hafa sífellt meiri áhyggjur af því að Kínverjar muni ráðast inn í Taívan til að tryggja yfirráð sín yfir eyjunni. Donald Trump hefur tekið harðari stefnu gagnvart Taívan og Kína en gengur og gerist í Bandaríkjunum.

Sjá einnig: Drekinn að ná í stélið á erninum



Talsmaður Utanríkisráðuneytis Kína sagði í morgun að Kínverjar væru alfarið andvígir vopnasölu Bandaríkjanna til Taívan. Hann sagði Kínverja hafa komið mótmælum sínum á framfæri við Bandaríkjamenn og þeir hefðu verið hvattir til að sýna skilning á því hve viðkvæmt málið væri og að vopnasalan myndi valda skaða.

Tsai Ing-wen, forseti Taívan, mun ferðast um Kyrrahafið í næstu viku en meðal annars stendur til þess að hún muni millilenda á Hawaii. Því hafa yfirvöld Kína mótmælt harðlega og hafa þeir beðið Bandaríkjamenn um að meina henni að millilenda þar. Kínverjar segja að það gæti sent frelsissinnum í Taívan „röng skilaboð“.