Ógnaði vegfaranda með eftirlíkingu af skotvopni

Karlmaður sem var handtakinn í Reykjavík í nótt er grunaður um að hafa brotið vopnalög. Hann er sagður hafa ógnað öðrum vegfaranda með eftirlíkingu af skotvopni.

Þetta er á meðal þess sem kemur fram í dagbók lögreglunnar á höfuðborgarsvæðinu eftir nóttina. Þar segir að skemmtanahald hafi farið þokkalega fram en að sex ökumenn hafi verið handteknir, grunaðir um akstur undir áhrifum áfengis eða fíkniefna.

Á meðal þeirra er sagður maðurinn sem er grunaður um að hafa brotið vopnalög með því að hafa eftirlíkinguna af skotvopni í fórum sínum.