Vertonghen fékk ekki heilahristing

Jan Vertonghen fékk ekki heilahristing í leik Tottenham og Ajax í Meistaradeild Evrópu á þriðjudag.

Vertonghen fékk þungt höfuðhögg eftir um hálftíma leik í fyrri undanúrslitaleik Tottenham og Ajax svo úr blæddi hressilega. Hann fékk aðhlynningu á vellinum en fékk leyfi til að halda áfram leik.

Mjög stuttu seinna kom í ljós að hann gat ekki haldið áfram og þurfti að hjálpa honum niður í leikmannagöngin þar sem hann gat ekki gengið óstuddur.

Læknateymi Tottenham hefur fengið gagnrýni fyrir að leyfa Vertonghen aftur inn á völlinn en félagið staðfesti í gærkvöld að belgíski varnarmaðurinn hafi ekki fengið heilahristing.

„Eftir ítarlega skoðun og eftirlit síðustu 48 klukkutímana af bæði okkar læknateymi og óháðs taugasérfræðings með sérstaka áherslu á íþróttatengda heilahristinga þá hefur verið úrskurðað að Jan Vertonghen fékk ekki heilahristing,“ sagði í tilkynningu frá Tottenham.

„Belgíski varnarmaðurinn fékk högg á nefið og blæddi mikið úr. Hann var dæmdur leikhæfur eftir skoðun á vellinum þar sem öllum verkferlum og reglum knattspyrnusambandsins var fylgt.“

Sérfræðingurinn ráðlagði Vertonghen að taka stuttan hvíldartíma áður en hann fari að æfa á ný.