LeBron gefur Davis treyjunúmerið sitt

Fjölmiðlar vestanhafs greina frá því að LeBron James ætli að eftirláta Anthony Davis treyjunúmerið 23 hjá Los Angeles Lakers.

Davis er á leið til Lakers en félagið lét New Orleans Pelicans fá þrjá leikmenn auk nokkurra valrétta í nýliðavalinu til að fá aðra stórstjörnu með James.

Davis lék í treyju númer 23, bæði hjá New Orleans og Kentucky-háskólanum. James fékk treyju númer 23 þegar hann gekk í raðir Lakers í fyrra en er tilbúinn að láta Davis fá númerið sitt.

James var númer 23 hjá Cleveland Cavaliers en þegar hann lék með Miami Heat á árunum 2010-14 var hann númer 6.

Leikmenn Lakers hafa úr færri númerum að velja en leikmenn annarra félaga í NBA-deildinni. Lakers hefur nefnilega lagt hvorki fleiri né færri en ellefu númer til hliðar: 8, 13, 22, 24, 25, 32, 33, 34, 42, 44 og 52.