Nýr Terminator í Los Angeles

Arnold Schwarzenegger er hinn eini og sanni Terminator en til að auglýsa nýja framhaldsmynd í Terminator-flokknum þá leiddu framleiðendur myndarinnar Arnold og körfuboltamanninn Kawhi Leonard saman.

Kawhi Leonard er einn besti körfuboltamaður heims í dag eftir að hafa leitt Toronto Raptors til sigurs í NBA-deildinni í sumar.

Mörg félög voru á eftir Kawhi Leonard í sumar en hann ákvað að semja á endanum við Los Angeles Clippers.

Arnold Schwarzenegger deilir sjálfur kynningarmyndbandinu með sér og Kawhi Leonard.

Margir hafa gefið Kawhi Leonard gælunafnið Terminator inn á vellinum enda virkar hann oft vélrænn í samanburði við aðra leikmenn en um leið geta fáir stoppað kappann.

Paul George, nýr liðsfélagi Kawhi Leonard hjá Los Angeles Clippers, er einnig í kynningarmyndbandinu sem og hin eina og sanna Sarah Connor.

Kawhi Leonard var frábær í fyrsta deildarleiknum sínum með Clippers á móti Los Angeles Lakers í nótt en hann skoraði 30 stig á 32 mínútum í leiknum auk þess að taka 6 fráköst og gefa 5 stoðsendingar.