Talinn hættulegur samfélaginu og því áfram í gæsluvarðhaldi

Héraðsdómur Reykjavíkur féllst á föstudag á kröfu lögreglustjórans á höfuðborgarsvæðinu um áframhaldandi gæsluvarðhald yfir karlmanni á fertugsaldri sem grunaður er um tilraun til manndráps. Þetta hefur fréttastofa fengið staðfest hjá Hildi Sunnu Pálmadóttur, saksóknara hjá lögreglunni á höfuðborgarsvæðinu.

Manninum er gefið að sök að hafa barið unnustu sína ítrekað, tekið hálstaki svo hún missti meðvitunda og rist hana á hægra læri með veiðihníf. Þá er hann sakaður um að hafa nauðgað konunni.

Krafan um gæsluvarðhald er byggð á grundvelli almanna hagsmuna. Karlmaðurinn sé hættulegur öðru fólki. Verður hann að óbreyttu í haldi til 6. desember. Lögmaður mannsins kærði ákvörðunina til Landsréttar sem hefur ekki úrskurðað í málinu.

Sagðist aldrei hafa lagt hendur á konur

Karlmaðurinn var handtekinn þann 7. október síðastliðinn en árásin átt sér stað að kvöldi föstudagsins 6. október og fram á næsta dag.

Árásin átti sér stað í gámum úti á Granda en um er að ræða úrræði á vegum Reykjavíkurborgar fyrir langt leidda fíkla.

Karlmaðurinn sagði við skýrslutöku eftir handtöku aldrei hafa lagt hendur á konur. Hann á þó að baki dóm fyrir ofbeldi gegn fyrri sambýliskonu.

 

Líflátshótun

Í greinargerð saksóknara með síðustu kröfu um gæsluvarðhald kom fram að málið væri rannsakað sem meint heimilisofbeldi, kynferðislegt ofbeldi og tilraun til manndráps. Lögregla hafi verið kölluð út að gámunum að morgni 7. október eftir tilkynningu frá konunni.

Átti hún erfitt með að tjá sig sökum eymsla í höfði en sagði þó að hinn grunaði, kærasti hennar, hafi barið hana ítrekað og nauðgað. Það hafi hún gert eftir að hún tilkynnti honum að hún ætlaði að hætta með honum. Hún hafi yfirgefið gáminn og leitað skjóls hjá nágranna.

Hinn grunaði hafi reiðst, fundið hana, tekið hálstaki með þeim afleiðingum að hún missti meðvitund. Hafi hún dregið hana yfir í gáminn sinn þar sem hann hafi rist grunnan skurð með hníf á hægra læri hennar. Því hafi hann séð eftir og þau farið að sofa.

Manninum var ekki runnin reiðin morguninn eftir að sögn konunnar. Hann hafi hótað henni lífláti með hnífi og sagst ætla að hengja hana. Hann hafi svo ráðist á hana og barið ítrekað í höfuðið, nauðgað henni og fengið sáðlát við það. Hann hafi þá aftur veist að henni með höggum.

Dæmdur fyrir ofbeldi gegn konu

Í framhaldinu yfirgaf hann gáminn að sögn konunnar en hótaði henni lífláti ef hún væri ekki enn þar þegar hann sneri aftur. Konan leitaði sér hjálpar hjá öðrum nágranna og hringdi í lögreglu sem mætti á svæðið.

Hinn grunaði neitaði alfarið sök við skýrslutöku hjá lögreglunni. Fullyrti maðurinn að hann hafi hvorki beitt konuna kynferðislegu ofbeldi né líkamlegu ofbeldi. Raunar segist hann aldrei á ævi sinni hafa lagt hendur á konur.

Samkvæmt sakavottorði mannsins hefur hann átta sinnum verið sakfelldur fyrir ofbeldisbrot, þar af fyrir ofbeldisbrot gegn fyrrverandi sambýliskonu sinni.

Meðal gagna málsins eru upplýsingar frá Fangelsismálastofnun þar sem kemur fram að samkvæmt niðurstöðum á fræðilegu mati sem var unnið af stofnunni voru taldar 61 prósent líkur á að hann mundi brjóta aftur af sér innan árs frá því hann lyki afplánun.

Félagsmálaráðherra hefur sagt að bregðast þurfi hratt við úrræðaleysi fyrir hóp manna sem taldir eru hættulegir en ganga lausir í samfélaginu. Um sé að ræða 10-12 manna hóp. Hinn grunaði er einn þessara manna.