Vilja spila með þrjá miðverði en mættu báðir með „hefð­bundna“ fjögurra manna vörn

Leikur Breiðabliks og Gróttu í 1. umferð Pepsi Max deildar karla á Kópavogsvelli í gærkvöld var merkilegur fyrir margar sakir sem hafa verið ræddar í þaula. Óskar Hrafn Þorvaldsson – maðurinn sem er ein helsta ástæða þess að Grótta er yfir höfuð í efstu deild – er nú þjálfara Breiðabliks. Þá er Ágúst Gylfason nú þjálfari Gróttu en hann þjálfaði Blika þar áður.

Leikurinn sjálfur var hálfgerð einstefna Blika frá upphafi til enda og áttu nýliðar Gróttu fá svör við frábærum leik heimamanna. Það sem vakti þó hvað helst athygli var sú staðreynd að bæði lið stilltu upp fjögurra manna varnarlínu og í raun einhverskonar afbrigði af 4-3-3 eða 4-2-3-1 leikkerfi.

Í aðdraganda mótsins hefur mikið verið rætt og ritað um leikstíl Blika og mætti Óskar Hrafn til að mynda í hlaðvarpsþátt Hjörvar Hafliðasonar, Dr. Football, og ræddi þar dálæti sitt á þriggja manna varnarlínu. Raunar gaf Óskar það út að Blikar yrðu í þriggja manna línu en annað kom á daginn í gær.

Anton Ari Einarsson var á sínum stað í markinu – þó svo að hann hafi eflaust eytt meiri tíma fyrir utan vítateig sinn heldur en inn í honum. Þar fyrir framan voru þeir Andri Rafn Yeoman, Elfar Freyr Helgason, Damir Muminovic og Davíð Ingvarsson. Djúpur á miðju var svo Oliver Sigurjónsson.

Þegar í ljós kom að Andri Rafn Yeoman – sem hefur undanfarin ár verið talinn einn af bestu miðjumönnum deildarinnar – væri í hægri bakverði þá grunaði blaðamanni að Andri yrði í því sem kalla mætti Pep Guardiola-hlutverki. 

Hér er átt við að Andri Rafn myndi þá stíga upp í miðjuna við hlið Oliver þegar liðið væri í sókn. Í stað þess var Andri líkt og rennilás á hægri vængnum. Hann lagði upp eitt af þremur mörkum Blika ásamt því að vera frábær varnarlega.

„Við höfum daðrað við þessa leikaðferð í vetur og Andri Rafn gæti eflaust spilað í marki ef þess þyrft. Hann er ótrúlegur leikmaður og ótrúlegur maður. Hann hélt Axel Sigurðarsyni niðri sem er ekki létt verk,“ sagði Óskar Hrafn að leik loknum um frammistöðu Andra í leiknum.

Þá var Grótta líka líka með hefðbundna fjögurra manna varnarlínu en Breiðablik á síðustu leiktíð spilaði nokkuð oft með þriggja manna línu undir stjórn Ágúst Gylfasonar og þá hafði Grótta leikið með þriggja manna varnarlínu í æfingaleik fyrir mót. Grótta stillti í raun upp þeim þremur leikmönnum sem væru að öllum líkindum í þriggja manna vörn liðsins en Bjarki Leósson hóf leik í stöðu vinstri bakvarðar frekar en í miðverði.

Þá kom nokkuð á óvart að Kristófer Melsteð – sem er örvfættur – hóf leik í hægri bakverði. Þó Ágúst gæti mögulega viljað stilla upp í þriggja manna vörn gegn Val í næstu umferð þá verður að telja ólíklegt að það gerist þar sem Arnar Þór Helgason fékk tvö gul spjöld í gær og þar með rautt.

Þá fékk Bjarki högg í fyrri hálfleik og var tekinn út af í hálfleik fyrir Ástbjörn Þórðarson sem fór í hægri bakvörðinn og Kristófer yfir í þann vinstri. Það verður því forvitnilegt að sjá hvað Ágúst gerir í næsta leik ef Bjarki er ekki leikfær.

Eitt lið hefur nú þegar stillt upp í þriggja miðvarða kerfi en það er KA sem tapaði 3-1 fyrir ÍA upp á Skaga. Þá er reiknað með því að Fjölnir leiki með þrjá miðverði er liðið mætir í Víkina og mætir Víking klukkan 18:00, að sjálfsögðu í beinni útsendingu Stöð 2 Sport.