Bjarni telur fráleitt að biðja „einhvern prófessor úti í Svíþjóð“ afsökunar

Þórhildur Sunna Ævarsdóttir, þingmaður Pírata, segir það með fullkomnum ólíkindum hvernig Bjarni Benediktsson fjármálaráðherra tali um fræðasamfélagið og norræna kollega sína.

„Hann heldur áfram að rægja „uppáhalds hagfræðinginn minn“ Lars Calmfors á opinberum vettvangi og sér greinilega ekki eftir neinu. Það er með ólíkindum að svona valdhroki fái að líðast í grafarþögn nú eða meðvirkni VG. Ótrúlegt!“ segir Þórhildur Sunna á Facebooksíðu sinni.

Þórhildur Sunna beindi fyrirspurn til Bjarna undir liðnum óundirbúnar fyrirspurnir á þinginu nú fyrir stundu. Hún spurði Bjarna út í afstöðu hans til yfirlýsingar Félags prófessora við ríkisháskóla þar sem mótmælt er harðlega því hvernig ráðuneytið beitti sér gegn því að Þorvaldur Gylfason prófessor væri ráðinn til að ritstýra norræna fræðiritinu Nordic Economic Policy Review.

Bjarni svaraði Þórhildi Sunnu og þá prófessorunum með óbeinum hætti fullum hálsi á þinginu.

Hver ætlar að biðja okkur afsökunar?

Vísir hefur rætt ítarlega við Lars Calmfors, en hann hefur meðal annars sagt að hann hafi aldrei á löngum ferli verið vændur um vinahygli eins og Bjarni lét að liggja á fundi stjórnskipunar og eftirlitsnefndar fyrr í vikunni.

Lars ætlaði að téð ummæli hlytu að hafa fallið í ógáti og honum þætti ekki úr vegi, eftir að Bjarni hafi hugsað málið, að hann bæði sig afsökunar á þeim ummælum. Þórhildur Sunna spurði Bjarna út í þetta en fjármálaráðherra þótti þetta algerlega fráleitt upplegg. Hann sagði þetta skrautlegan málflutning. Í fyrsta lagi væri það svo að hann hafi aldrei fullyrt eitt eða neitt heldur liti þetta svo út úr fjarlægð sem tveir kunningjar væru að spjalla saman um þetta.

„Ég hefði ekki hugmynd um það. En það hefur nú komið fram í millitíðinni, staðfest, að uppáhalds prófessor þingmannsins voru vinir. Hvers vegna í ósköpunum ætti ég að biðja einhvern prófessor úti í Svíþjóð afsökunar á því að benda á það sem allir sjá eftir að gögn málsins hafa komið fram? Án þess að við Íslendingar værum spurðir þá voru menn byrjaðir að tala saman og póstur farinn á prófessorinn þar sem honum var boðin staðan. Hver ætlar að biðja okkur afsökunar á því?“ sagði Bjarni.

Prófessorar falla á prófinu að mati Bjarna

Bjarni sagði einnig að stjórn Félags prófessora hafi fallið á prófinu.

„Fallið á prófinu um raunhæfa verkefnið sem við höfum hér verið að ræða um. Ekki tekið tillit til ólíkra sjónarmiða, ekki getið heimilda og svo framvegis, byggt á einhliða frásögn af málinu og komist að niðurstöðu án þess að ígrunda allar hliðar málsins. Hér er einfaldlega ekki um að ræða mál sem réðist á pólitískum forsendum og þessi ályktun hefur ekkert vægi inn í þetta mál. Sama gildir um áhyggjur þessa prófessors úti í Svíðþjóð. Skiptir engu máli inn í umræðu dagsins í dag hver hans upplifun er,“ sagði Bjarni.

Fjármálaráðherra sagði að svo virðist sem Lars hafi haft áhrif á það að staðan var boðin Þorvaldi. „Án þess að við Íslendingar værum spurðir. Og það er forkastanlegt.“