Dýragarðsvörður lést eftir árás tígrisdýrs

Dýragarðsvörður í svissnesku borginni Zürich lést í dag eftir að hafa orðið fyrir árás fullvaxta tígrisdýrs.

Dýragarðsvörðurinn var staddur inni í búri Síberíu-tígrisynjunnar Irinu en ekki er vitað af hverju. Dýragarðurinn var opinn þegar atvikið varð og tilkynntu gestir um veru varðarins í búrinu. BBC greinir frá.

Gerðar voru tilraunir til þess að lokka dýrið frá konunni en eftir að það hafi tekist mistókust endurlífgunaraðgerðir. „Hjálpin kom of seint,“ segir talskona lögreglunnar í Zürich.

Dýragarðinum hefur nú verið lokað og hefur þeim sem urðu vitni að atvikinu verið boðin áfallahjálp. Skammt er frá síðustu hættulegu árás dýrs á dýragarðsvörð í Zürich en í desember síðastliðnum var krókódíll skotinn til bana eftir að hafa bitið dýragarðsvörð í handlegginn þegar þrif stóðu yfir.