Í­halds­flokkurinn HDZ vann sigur í Króatíu

Andrej Plenkovic, forsætisráðherra Króatíu, og íhaldsflokkur hans, HDZ, hafa fengið umboð til að mynda nýja ríkisstjórn eftir að flokkurinn vann sigur í þingkosningunum sem fram fóru í landinu í gær.

HDZ hefur verið ráðandi afl í stjórnmálum landsins í þau tæplega þrjátíu ár sem liðin eru frá sjálfstæði. Þegar búið var að telja um 90 prósent atkvæða var HDZ með 68 þingsæti af því 151 sem eru á þinginu.

Jafnaðarmannaflokkurinn SPD hlaut næstflest atkvæði og 42 þingsæti, en þar á eftir var hægriöfgaflokkurinn DPMS sem fær fimmtán þingsæti.

Fréttaskýrendur segja HDZ nú í þægilegri stöðu þar sem þeir geta nú valið um samstarfsflokka og þurfa því ekki að treysta á stuðning flokka yst á hægrivængnum.

Plenkovic og stjórn hans hefur verið hrósað vegna viðbragða við heimsfaraldrinum, en alls hafa um þrjú þúsund smit verið skráð í landinu og hafa um hundrað dauðsföll verið rakin til Covid-19. Í landinu búa 4,2 milljónir manna.

Davor Bernardic, leiðtogi SPD, greindi frá því í gærkvöld að hann myndi segja af sér formennsku og óskaði hann jafnframt Plenkovic og HDZ til hamingju með sigurinn.