Aron: Leyfist engum að vera hátt uppi

Rússneski björninn bíður íslenska landsliðsins í kvöld og Aron Pálmarsson veit að það verður snúið verkefni.

„Þetta er allt annað lið en Danir. Við höfum verið að skoða þá og þeir eru með góða leikmenn í góðum liðum. Þetta er allt annar handbolti en þeir eru mjög aggressífir og árásir upp úr engu,“ segir Aron.

„Við verðum að vera vel einbeittir allan leikinn. Liðið hefur fulla trú á því hvað það geti gert eftir Danaleikinn. Við vitum að þetta er bara rétt byrjað og það leyfist engum að vera hátt uppi eftir einn leik. Sérstaklega miðað við hvernig síðustu tvö EM hafa verið hjá okkur.“

Leikurinn hefst klukkan 17.15 í dag og verður í beinni textalýsingu á Vísi.