Alexander besti maður íslenska liðsins á EM

Hinn 39 ára gamli Alexander Petersson var besti maður íslenska karlalandsliðsins á Evrópumótinu í handbolta samkvæmt einkunnagjöf Íþróttadeildar Vísis og Stöðvar tvö Sport.

Alexander Petersson var með 4,29 í meðaleinkunn í leikjunum sjö en hann fékk alls þrjár sexur á mótinu.

Alexander snéri aftur í landsliðið eftir fjögurra ára fjarveru og var magnaður á meðan hann hafði bensín á tankinum.

Það er hins vegar ekki hægt að ætlast til þess að maður, sem heldur upp á fertugsafmælið sitt í sumar, geti staðist álagið að spila stórt hlutverk í vörn og sókn í sjö leikjum á tólf dögum. Alexander gerði því ótrúlega vel þótt að hann hafi gefið mikið eftir í milliriðlinum.

Þrír voru jafnir í öðru sæti en það voru þeir Guðjón Valur Sigurðsson, Viktor Gísli Hallgrímsson og Ýmir Örn Gíslason með 4,00 í meðaleinkunn.

Guðjón Valur er fertugur á sínu 22. stórmóti, Viktor Gísli Hallgrímsson 19 ára á sínu fyrsta stórmóti en Ýmir Örn er 22 ára og á sínu fyrsta stórmóti í aðalhlutverki í varnarleik íslenska liðsins.

Björgvin Páll Gústavsson endaði í fimmta sæti og því eru báðir markverðir íslenska liðsins á topp fimm.

Tveir bestu leikir íslenska liðsins voru fyrstu tveir leikirnir á móti Dönum og Rússum þar sem íslensku strákarnir voru með 4,73 og 4,85 í meðaleinkunn. Lakasti leikurinn var sá á móti Ungverjum (2,62) en leikurinn á móti Svíum í gær var litlu hærri með meðaleinkunnu upp á 2,63.

Kári Kristján Kristjánsson var besti maður íslenska liðsins í lokaleiknum en það kom þó ekki í veg fyrir að hann sé við botninn í heildaruppgjörinu. Kári og Elvar Örn Jónsson voru með lökustu meðaleinkunnina af þeim sem fengu einkunn fyrir fleiri en tvo leiki. Meðaleinkunn þeirra var 3,14.

Hæsta meðaleinkunn íslensku landsliðsmannanna á EM 2020:

1. Alexander Petersson    4,29

2. Guðjón Valur Sigurðsson    4,00

2. Ýmir Örn Gíslason    4,00

2. Viktor Gísli Hallgrímsson    4,00

5. Björgvin Páll Gústavsson    3,71

6. Bjarki Már Elísson    3,67

7. Viggó Kristjánsson    3,60

8. Ólafur Guðmundsson    3,57

9. Sigvaldi Guðjónsson    3,50

9. Janus Daði Smárason    3,50

11. Arnór Þór Gunnarsson    3,33

11. Haukur Þrastarson    3,33

13. Aron Pálmarsson    3,29

14. Kári Kristján Kristjánsson    3,14

14. Elvar Örn Jónsson    3,14

15. Sveinn Jóhannsson    3,00